Ўзбекистон Халқ Ҳаракати

ЭЧКИГА ЖОН ҚАЙҒУ – ҚАССОБГА МОЙ ҚАЙҒУ

ЭЧКИГА ЖОН ҚАЙҒУ – ҚАССОБГА МОЙ ҚАЙҒУ
29 Kasım 2013 - 18:47 'да юкланди ва 599 марта ўқилди.

hokimiyatТуман миқёсида ўтказилаётган навбатдаги мажлисда Туман маориф бўлими мудири Ҳоким буйруқларини бажариш ҳақида гапирар экан,
Фермер хўжаликларида ўргимчакканага қарши кураш учун мактаб ўқитувчилари сафарбар қилинишини, бу ишга мактаб биология ўқитувчиларини жалб этиш кераклигини, ва иш натижасига кўра ҳар бир ўқитувчига 6 қоп буғдой ва 100 дона сомон пресси берилишини айтар экан, Исоқжонга жон кирди.
Ўқитувчилиги учун бериладиган 550 минг сўм катта оиласининг тирикчилигини таъминлашга етмай турганда, 6 қоп буғдой кўзига катта хазина бўлиб кўринди. Мактаб директори билан гаплашиб 3 та фермернинг ерида ишлаши мумкинлигини, бунинг эвазига бериладиган буғдой ҳам, сомон ҳам уч баробар ортишини келишиб олишди.

Мана ўғлининг велосипедини миниб олганча дарсдан кейин то шомгача дала кезади, пахтага тушган ўргимчакканаларни топади, картада белгилайди, фермерларга етказади.
Тўғри, қийин, кечгача тили осилиб қолади. Аммо 18 қоп бўғдой ҳам кам эмас-да.
Шу ҳаёллар билан велосипедни ғиззиллатиб кетаётиб, нима бўлди-ю йўл четидаги зовурга тушиб кетди.
Усти боши лой, велосипедни судраб чиқар экан, бир пайтлар ўзи ўқитган Содиқжон келиб қолди.
– Ҳа, домла, тинчликми?
– Э-э, кўрмайсанми, шошилиб кетаётиб зовурга тушиб кетдим.
– Қаерга шошаяпсиз?
Исоқжон ўзининг ўргимчакканани тугатиш кампаниясида ишлаётганлигини айтганида, Содиқжон қаҳ-қаҳ отиб кулиб юборди. Ўқитувчисининг бунчалик соддалигидан кулар эди у.
– Домлажон, шунчалик ҳам куюнчак бўладими одам. Унинг устига сизнинг ёшингизда.
Исоқжон мана 17 йилдирки ўқитувчилик қилади. Мактабда дарс беришдан ташқари пахта чопиғи-ю терими, яганаси-ю чеканкаси, гўнг ташиш ишларига мактаб ўқувчиларини олиб чиқади.
Ўтган йили давлат томонидан қурилаётган уйларнинг қурилишларида ҳам ишлашди. Мана энди ўргамчакканага қарши курашиб ётишибди. Ҳокимият томонидан тавсия этилган янги услубларни қўллашаяпти. Изофен дорисини ОДНда (дори сепадиган ускуна), сепилса дори баргнинг устига тушади, ўргимчаккана эса баргнинг орқа томонига уя қуриб, ўша жойда яшайди.
Дори унга етиб бориши учун ялпиздан фойдаланиш тавсия этилади. Ялпиз, 1-дан даладаги ариқлар бўйида сероб, ундан ташқари ялпизнинг танасида майда тукчалар бўлиб, улар ялпиз сувга ботириб олинганда изофенни ўзларида тутиб қолади ва ғўзанинг тагидан туриб силкитилса, баргнинг орқасига сочилади.
Бу услубнинг аввалги супурги қўллаб ишлатилганлигидан афзаллиги шундайгина билиниб турибди. Чунки дорига ботирилган супургидан суюқлик оқиб кетади ва барг ортига етиб бормайди.
Шуларни ўйлар экан, Исоқжон ўз-ўзидан деҳқончасига фикр юритаётганлигини сезиб қолади. Аммо изофен қургур заҳар бўлса, уни сепиб юрган одамлар, айниқса болаларнинг аҳволи нима бўлади? Бу масала ҳеч кимни қизиқтирмайди.
Туманда сариқ касал эпидемия бўлиб кетди. Больницаларга одам сиғмайди.
– Домла, агар ҳоҳласангиз мен сизга телефон номеримни берай, сиз мендан қаерда касаллик борлигини биласиз, тавсияларингизни берасиз. Аммо сиздай домламнинг бу аҳволда юриши менга алам қилади. Домла.
Исоқжон уст боши лой, жиққа ҳўл аҳволда телефонини олди. Телефон ҳам сувга бўкиб ишламай қолган.

Мана, пахта терим даври бошланди. Буғдой ҳирмонда. Энди ўша ваъда қилинган буғдойю сомоннни олса…
Аммо директор ўз берган ваъдасини ҳеч эсламайди.нима қилсин? Ўзи гап бошлади.
– Мен сизга ваъда бермаганман. РайОНОнинг мудирининг гапи бу. Энди-и, қўйинг Исоқжон, бу гапни кўтарангиз сизни ҳам мени ҳам ишдан бўшатиб юборишади…
Исоқжонга алам қилди. Алам қилади-да. Ёзи билан ўзини ўтга чўққа уриб зовурларга тушиб кетиб, бир аҳволда қилган меҳнатлари чиппакка чиқди.
Энди яна эски тос, эски ҳаммом. 400 минг сўмдан пахта заводидан ғўзапўчоқ сотиб олади молларига. Буғдой йўқ. Тирикчилик ҳам йўлга тушмайди. Энди яна бир касби сувоқчилик қилмаса бўлмайди.
Бошини қайси тошга урсин? Эчкига жон қайғу-қассобга мой қайғу. РайОНО мудири ҳам, мактаб директори ҳам ўз креслоси ташвишида. Содиқжонга ўҳшаганлар эса тирикчилик ташвишида. Кун ўтарга яшаб юришибди.
Олдинда эса ёруғлик кўринмайди.

Эркин Садриев

Etiketler :
Хабарга ўз изоҳингизни қолдиринг

Сўнгги хабарлар
Ўхшаш хабарлар