Тошкентдан борган диндор Қарши шаҳар ИИВда ўлдирилди

Тошкентдан борган диндор  Қарши шаҳар ИИВда  ўлдирилди
157 views
16 May 2012 - 19:38

Ўзбекистонда мусулмон бўлмоқлик оғир бўлиб қолган. Ислом динига эътиқодда бўлган мамлакат фуқаролари тез-тез ё якка тартибда, ёки оммавий қамоққа олиниб турмаларга юборилиб турилади. Уларга уйдирма айбларни қўйиш аксарида муваффақиятли тугасада, аммо баъзида бўлғуси маҳкум жиноят содир қилганини тан олмайди. Шундай вақтда у калтаклар остида ўлади холос. Бошқа йўл йўқ!

Шу йилнинг 11 май кунида, тахминан соат 15.00 да Қарши шаҳрида 1975 йилда туғилган фуқаро Тошев Рамиз вафот этганлиги ҳақида яқинларига хабар келди. У апрель ойи бошида Қарши шаҳар Ички ишлар бўлимига бир келиб кетиш учун чақиртирилганди. Рамиз машинасида бир аёлни салгина туртиб “юборгани” ҳақида ариза борлиги ва улар шуни текширмоқчи эканликлари унинг чақиртирилишига асос бўлган.

Рамизнинг яқинлари таъкидлаётганларига кўра, у Тошкентда яшар ва машина эхтиёт қисмлари савдоси билан шуғулланарди. Тағин унинг бир “айби”, диндор мусулмон эканлигидир. У бир неча йил олдин оиласи билан бирга Қарши шаҳридан Тошкентга кўчиб кетганди. Унинг яқинлари Қарши шаҳрининг Жамила Жумаева кўчасида яшашади.

Тошкентда Рамизга нисбатан таъқиблар бошланаркан, улардан қочиб Қаршига қайтиб келганди. Аммо бу ерда ҳам тинчлик бўлмайди ва машинасида бир аёлни туртганлиги каби ёлғон баҳона билан Қарши шаҳар ИИБ чақиртирилади. Апрель ойи бошларида бўлган бу воқеада у ҳибсга олинади. Кейин эса Рамиз бировни машинасида туртиб юбормагани, балки Ўзбекистон Жиноят Кодексининг 159, 244 моддаларида кўрсатилган жиноятни содир этганлиги “аниқлашади”.

Бир ой давомида қўлланилган қийноқлар натижасида у айбини бўйнига олмай, Қарши шаҳр ИИБ сида жон таслим қилди. Унинг майитини ювганлар таъкидлаётганларига кўра, боши шишиб кетган, танаси кўкарган. Яқин қариндошларига эса ИИБ си Рамиз ўзини ўзи осганлигини билдиришган. Унинг жонсиз жасадини яқинлари ўликхонадан олиб келишади. Уйда бор йўғи уч соат сақланган мурда кечки соат 18 да қабрга қўйилган.

Тошев Рамиз 37 ёшда эди ва уч нафар фарзанднинг отаси ҳам эди. Уни диний мотивларда айбламоқчи бўлишган, аммо у оддин намозхон йигит бўлган холос.

Айни дамларда Тошев Рамизнинг яқинларига милиция томонидан таъзйиқлар ўтказилмоқда ва уларга бирор жойга даъво қилмаслик қаттиқ уқтирилган. Милиция расмийларининг берган ваъдаларига кўра, улар Рамизнинг ўлими учун ўз ораларидан кимнидир жазолаб беришни ваъда қилишган.

Сарвар Пўлатов
Тошкентлик Хабарчимиз.