Каримов қароргоҳи яқинида отишма содир бўлди

Каримов қароргоҳи яқинида отишма содир бўлди
31 views
21 May 2013 - 9:38

16 май куни Тошкент вилояти Қибрай туманининг Дўрмон қишлоғида ҳарбий кийимдаги номаълум кишилар ўртасида отишмалар содир бўлди. Ушбу воқеага гувоҳ бўлган дўрмонликларнинг айтишича, мовий рангли камуфляж формадаги бир гуруҳ ҳарбий кулранг камуфляж кийимдаги 5-6 кишилик гуруҳнинг ўқотар автоматлардан уюштирган ҳужумни қайтарган. Ҳарбий кийимдаги одамларнинг ўзаро отишмаси таҳминан 15-20 дақиқа давом этган.

“Автомат овозлари тингач, отишма содир бўлган ҳудудни бир зумда милиция ходимлари ва ҳарбийлар “оцепление” қилишди. Бизларга ҳам уйларимиздан чиқмаслик буюрилди”, – деди Дўрмон қишлоғи турғунлардан бири. Унинг айтишича, бу тўқнашув президент Ислом Каримов истиқомат қиладиган “Дўрмон” қароргоҳининг шимолий дарвозаларига яқин ҳудудда содир бўлган.

Экспертларнинг айтишича, 16 майда бўлиб ўтган ушбу воқеалар ҳукумат харбийлари ва номаълум кишилар ўртасидаги ҳақиқий жанг ёки ҳукумат ҳарбийларининг амалий машғулоти бўлиши ҳам мумкин. Чунки охирги пайтда оммавий ғалаёнлардан ва ташқи ҳарбий хуружлардан ҳавфсираб кун кечираётган президент Ислом Каримов ва унинг кучишлатарлари бундай оқибатларга қарши машғулотлар ўтказаётгани ҳеч кимга сир эмас.

ЎХҲ хабар маркази