“Хотин, сен вақтинча Президент бўлиб тур…”

“Хотин, сен вақтинча Президент бўлиб тур…”
105 views
24 June 2013 - 10:36

Бу гап жиддий гап. Президентлик муддати тугаётган Озарбойжон раҳбари Илҳом Алиев қайта тахтга келиш учун мана шундай сиёсий усулни ишлатишга қарор қилганга ўхшайди. (centrasia.ru). Аслида бунга ўхшаш усуллар сиёсатда янгилик ҳисобланмайди.MA

АҚШ собиқ президенти Билл Клинтон хотини Хиллери Клинтонни Президент бўлишга ташвиқ қилганди. Албатта, Билл Клинтон бу ишни ўзининг қайта тахтга келиши учун қилмаганди. Унинг хотини президентлик мусобақасини ҳозирги Президент Обамага ютқазсада, кейинчалик Ташқи Ишлар Вазирлиги лавозимини эгаллаганди.

Русия Президенти Путин хотинига бўлмаса ҳам яқин ҳамкори Димитрий Медведевга Президентлик мақомини омонатга бериб турганди. Чунки у Илҳом Алиев каби кетма кет учинчи марта давлат раҳбарлигига сайлана олмасди. Гўё сиёсий одоб ўрнаги сифатида ўз дўстига мақомини вақтинча ҳадя қилганди.

Туркияда ҳам ҳозирги Бош вазир Тойиб Эрдўғон ўзи парламент аъзоси бўлмагани учун партиядош дўсти Абдуллоҳ Гулнинг 2002 йилги сайловлардан кейин Бош Вазир бўлишига рози бўлганди. Туркияда парламент бошқаруви ҳукмрон бўлгани тафайли 2007 йилги Президентлик сайловларида партия раиси Эрдўғон эмас, яна Абдуллоҳ Гул Президентликка номзод бўлди. Тойиб Эрдўғон учун сиёсат майдони доимо муаммоларга тўла бўлган аслида. У устози Эрбоқоннинг “Фазилат” партиясида раҳбарликни қўлга олиш учун кураш бошлаган пайтда ҳам ўзи партия раислигига номзод бўла олмагани учун бу ишни Абдуллоҳ Гулга топширганди…

Озарбойжонда бу йил президентлик сайловлари ўтказилади. Учинчи марта номзод бўла олмайдиган Илҳом Алиев вақтинчалик президентликни хотини Меҳрибон Алиевага бериб туришга қарор қилганга ўхшайди. Бу ҳам ўзига яраша бир сиёсий “одоб” ўрнаги. Сайлов дейсизми? Бундай натижаси олдиндан маълум сайловларнинг ўйин ва масхарабозликдан иборат эканлигини ҳамма яхши тушунса керак…

Фурқатбек

24.06.2013