Ҳуқуқбон Бобомурод Раззоқовга одам савдоси жиноятини уйдирмоқдалар

Ҳуқуқбон Бобомурод Раззоқовга одам савдоси жиноятини уйдирмоқдалар
77 views
10 July 2013 - 21:27

Ўзбекистонда яна бир ҳуқуқ ҳимоячисига нисбатан жиноят иши очилди. Бухоролик таниқлик ҳуқуқбон Бобомурод Раззоқов одам савдоси билан машғул бўлганликда айланмоқда. Уни бугун (2013 йилнинг 10 июль) тергов идоралари сўроққа тутди ва биз яна бир ҳуқуқбоннинг туҳмат балосига гирифтор бўлиб кўрмоқдамиз.

Нимагадир Ўзбекистонда ҳуқуқбонлар жуда жиноятчи “бўлишади”. 70 ёшдан ошиб қолган отахон Ҳасан ота Чориев 20 ёшлик аёлни “зўрлайдими”, 61 ёшдан ошган Бобомурод Раззоқов одам савдоси билан “машғул”. Буни қарангки, ҳуқуқбонларимиз “товламачи” ҳам бўлиб қолишади, нашафурушлик “қилганлари” ҳам бор. Фақат ҳукуматимиздаги казо-казолар жиноятчилар эмас. Масалан, президентимизнинг қизи миллионлаб долларларда пора олса ҳам биров ундан “нега бунақа қилдинг” деб сўрагани йўқ.

Лекин ҳуқуқбонларни эса мутлоқ қилмаган жиноятларида айблаб қамоққа тиқиб юбораверишади. Ва бунинг учун демократияни тамсил этаётганликларини даъво қилувчи давлатларнинг ҳукуматлари қайғураётгани ҳам йўқ.

Ўзбек сиёсий мухолифати, ҳамда ҳуқуқбонлар ҳам биргаликда фаолият олиб борганларида эди, унда биз билан ҳамма ҳисоблашган бўларди. Ҳаттоки ватандаги ўша диктатура режими ҳам. Афсуски, бошларимиз бирикмайди ва бу бошларни навбат билан, битта, битта кесиб ташлашмоқда.

Ҳуқуқбонларимиз шафқатсиз бир шернинг олдида турган қуролсиз ва ҳимоясиз ҳолда турган овчига ўхшайдилар. Уларнинг умрлари қанчалар узун бўлишини эса ўша йиртқич шернинг иштаҳасига боғлиқ бўлиб қолди. Йиртқич ўзи истаган вақтида ҳуқуқбонни ёриб ташлайди.

Тўлқин Қораев