ЎЗБЕКЛАР УЙГА!

ЎЗБЕКЛАР УЙГА!
107 views
13 August 2013 - 9:07

“Фарғона” халқаро ахборот агентлигининг хабар беришича, Россияда меҳнат муҳожирлари ёппасига қўлга олина бошланди. Фақат Красноярскда ўтказилган рейдда 600 нафар хитойлик “Север районидаги иссиқхоналарда қонунга хилоф тарзда ишлаб келаётганлари” аниқланди, дея хабар беради РИАН. Қўлга олинганлар “Чет эллик фуқаронинг Россия Федерациясига кириш ёки Россия Федерациясида бўлиш тартибини бузиш” моддаси бўйича 934 минг рублга жаримага тортилди.
Газета.Ру хабар беришича, Тюмень шаҳрининг қурилиш майдонлари ва бозорларида ўтказилган рейдлар давомида 800 нафар муҳожир (аксарияти ўзбек, тожик) ушлаб кетилган.
Қизиғи шундаки, Россия муҳожирлик қонунчилининг бузилиши тўғрисида 60 та маъмурий баённомалар тузилган, холос. Қолган муҳожирлар нимага асосланиб қўлга олингани тўғрисида эса маълумот берилмаган.

Пермда 413 нафар меҳнат муҳожири қўлга олинди, 11 та маъмурий протокол тузилди. Қолган 402 киши нега “нолегал” дея хабар берилаётгани ҳақида ҳам Газета.Ру хабар бергани йўқ.

Москвада 13 август куни “нолегал мигрантларга” қарши йўналтирилган репрессия ва “тозаловлар” кампаниясига қарши пикет бўлиб ўтади. Тадбирнинг Фейсбукдаги саҳифасида шундай деб ёзилган: “Биз Москва расмийларининг шу бугунги кунда одамларни “ўзиники” ва “бегона”ларга ажратадиган сиёсатидан ғазабланмоқдамиз. Биз Гольяновода концентрация лагери тузилишига ҳамда расмийларнинг бундай лагерларни бутун Россия бўйлаб тузиш ниятига қаршимиз.

Биз бу муаммога бефарқ бўлмаганларнинг барчаларини бизнинг норозилик акциямизга қўшилишига чақирамиз. Биз барча москваликларга мурожаат қилиб, шаҳримизда ўтказилаётган полиция “рейдларига” ва концентрация лагерларига ҚАРШИ чиқишга чақирамиз”.

Пикет ўтказиш учун рухсат олинган ҳамда соат 19.00 да Москвадаги Лермонтов ҳиёбонида ўрнатилган мавсумий ишчи ёдгорлиги олдида ўтади.