Бишкекда ШҲТга аъзо давлатлар бошлиқларининг мажлислари бошланди

Бишкекда ШҲТга аъзо давлатлар бошлиқларининг мажлислари бошланди
55 views
13 September 2013 - 10:34

 

саммит ШҲТБугун, 13 сентябрда Бишкекда ШҲТга аъзо давлатлар бошлиқларининг тор доирадаги мажлиси бошланди.

Кеча Бишкекда Ўзбекистон, Қозоғистон, Қирғизистон, Хитой, Россия ва Тожикистон раҳбарларининг амалий учрашуви бўлиб ўтган эди.

Ca-news сайтига кўра, Расмий дастурга мувофиқ ШҲТ Давлат раҳбарлари кенгашининг мажлиси тор доирадаги учрашув билан бошланади. Анъанага кўра, мажлис кенгайтирилган таркибда давом этади. Аъзо мамлакатлар раҳбарлари даврасига кузатувчи давлатлар ҳамда халқаро ташкилотлар вакиллари қўшилади.

Давлатлар раҳбарлари ташкилот фаолиятини янада такомиллаштириш, узоқ муддатли яхши қўшничилик ва дўстлик муносабатларини ривожлантириш, минтақавий хавфсизликни таъминлаш, ШҲТ маконида иқтисодий ва гуманитар ҳамкорликни фаоллаштириш юзасидан фикр алмашадилар.

Давлат раҳбарлари кенгаши мажлиси якунида Бишкек декларацияси қабул қилиниши, ШҲТ доирасидаги кўп томонлама ҳамкорликни янада кенгайтириш ва ривожлантиришга қаратилган қатор ҳужжатлар имзоланиши кутилмоқда.

Ўзбекистон Республикаси Президенти Ислом Каримов Қирғизистон Республикаси Президенти Алмазбек Атамбаев билан учрашди. Музокарада Ўзбекистон-Қирғизистон муносабатларига доир масалалар юзасидан фикр алмашилди.

Қирғизистон президенти аппарати сиёсат бўлими бошлиғи Сапар Исақовнинг айтишича, ШҲТга аъзо давлатлар бошлиқлари кенг доирага ёйиш мумкин бўлмаган ўта муҳим масалаларни тор доирада муҳокама қилишади.

Шундан сўнг кенгайтирилган таркибда давлат бошлиқлари бошқа долзарб масалалар – минтақавий ҳамда ШҲТ таркибига кирган мамлакатлар хавфсизлиги, шу билан бирга Суриядаги хавфсизликка оид масалаларни муҳокама қилишади.

Мажлисда ҚР президенти Алмазбек Атамбаев, ХХР раиси Си Цзиньпин, Россия президенти Владимир Путин, Тожикистон президенти Имомали Раҳмон, Ўзбекистон президенти Ислом Каримов қатнашмоқда.

Эрон, Афғонистон президентлари назоратчилар сифатида келишган.

 

ЎХҲ хабар маркази