Қоне

Қоне
88 views
15 September 2013 - 9:04

Эл учун бергувчи жон, айт ўшал жонинг қоне,

Ҳар неки айтишга осон, лек бажарғонинг қоне?

Осмонингда бахт қуши парвоз этаркан тинмайин,

Зулмат ичра қолди ошён, ёруғ замонинг қоне?

Кўп машаққат чекди халқинг мустақил даврон учун,

Йўл бошида ваъда қилғон давру давронинг қоне?

Пахтаю, буғдой экиб, тансиқ бўлибди бурда нон,

Қайда ул озурда ошён, озод дехқонинг қоне?

Ким Аллоҳга топингайдир, ким тоза иймон эрур,

Бўлди бари аҳли зиндон, хай, мусулмонинг қоне?

«Қайга борсам ғоз юрурман, бошда дўппим, гердайиб»,

Дўппи бошга бўлди армон, яктак, чопонинг қоне?

Ким соқол қўйса мабодо,қўрқадурсан не учун?

Титрагайсан айтса Азон, қўлда қуръонинг қоне?

«Келажаги буюк давлат, хамма нарса «ВО!» бўлар»

Деганди бир лафзи арзон, жаннат рўзвонинг қоне?

Қишу, ёзу, куну, тун тер тўкар дехқонларинг,

Айтчи ўзинг, Бисмил Раҳмон, тилла ҳамёнинг қоне?

Бобом эккан чинор қоне, кесдиму танноз қизинг,

Хатто Темур қолди ҳайрон,-Тошкан, ўрмонинг қоне?

Дарёларда балиқлар йўк, тоғда хайвон қолмади,

Бўлмаса сайёдда пайкон, оҳу, жайронинг қоне?

Кўз ёшим боргай қуруб, шўри шўр Орол каби,

Сир, Амуни бериб қурбон, уйган хирмонинг қоне?

Мирзачўл қовуни қайда, қайда қува анори,

Бариси бўлдими пайҳон, Мирзагулистонинг қоне?

«Бермасалар пармаларни, ковлагум тирноқ билан»-

Айт, ўшал олтинга кон, зарли Зарафшонинг қоне?

Ҳонумонига ўт кўйиб, қирғиз қирар ўзбекларинг,

Элбошисан, элга қалқон, тиғи, пайконинг қоне?

Кеча бағрингга босиб, қучлаган юлдузларинг,

Қайси юртда кезар сарсон, гулу райҳонинг қоне?

Мадҳия ўқувчи маддох, шўравий шоир замон,

Халқи сарсон, куйи шодон, тили бийронинг қоне?

Чин шоирин кетди-қолди, дарди кетди қалбида,

О, Муҳаммад-ширин забон, мулки Дархонинг қоне?

Халқ денгиздир, халқ тўлкиндир, халқ – бу куч деганлари,

Бул замонда чекди афғон, Фитрат, Чўлпонинг қоне?

Пахта, буғдой дастидан ҳеч  қолмади бир парча ер,

Ўтлоғини излар чўпон, қатиқ, айронинг қоне?

Шох Эдипу, қирол Лирлар этдилар ўзни фидо,

Хақ деб ўз кўзин ўйган Шукур Бурхонинг қоне?

Кўзи сўқир, тани чўлтоқ, гунг, гаранг бечоралар

Қайга борсин ул ногирон, ҳайри, эхсонинг қоне?

Мажнунтолу, оқ ўриклар ўрнига экдинг чўкир,

Ҳар баҳор булбулга ошён яшил ўрмонинг қоне?

Йўқ нарсани бор этиб, чаноққа пахта тикиб,

Қилган ишинг бўлди ёлғон, дилда туғёнинг қоне?

Ер қаттиқ, йироқ осмон, қирилди минг минг инсон,

Қонга тўлди Андижон, Дукчи Эшонинг қоне?

«Маърифат шуъласига толпинган зулмат аро»-

Кўз ёши Кавкабистон, лутфи Дурмонинг қоне?

Сен кима бердинг адаб, барчаси шуҳратталаб,

Тоза виждон, тоза иймон қизу ўғлонинг қоне?

Эл дардини куйлаган, эркка бўйин бўйлаган,

Етмишда ҳам урган жавлон ул Дадахонинг қоне?

Доимо бирлик тараф, Туркистонни орқалаб,

Рауф Парфи кетди гирён, аҳли Туронинг қоне?

Эл улус ичра мулзам, ваъда берувчи муттаҳам,

Ўз ўзингга берган олтин нишонинг қоне?

Кўкрагим сенга очиқ, мард бўлсанг майдонга чиқ,

Сен шер бўлсанг, менман арслон, қоне майдонинг, қоне?

Озодбек Элкезар