Тожикистон: Мухолифат ягона номзоди Ойниҳол Бобоназарова президентлик сайловига қўйилмади.

Тожикистон: Мухолифат ягона номзоди Ойниҳол Бобоназарова президентлик сайловига қўйилмади.
72 views
11 October 2013 - 15:16

3E8E0F6D-94D6-4620-9184-AE85D9F34A60_w640_r1_s_cx0_cy4_cw0

Бирлашган ислоҳотчи кучлар мухолифат ҳаракатининг ягона номзоди Ойниҳол Бобоназарова Тожикистон президентлигига давогарлар рўйхатига киритилмади. У бунинг учун талаб қилинган 210 минг имзони тўплай олмагани айтилди.

“6-ноябрда бўлиб ўтиши кутилаётган президентликка сайловда биргина Ойниҳол Бобоназарова амалдаги президент Имомали Раҳмонга реал рақиб бўлиши мумкин эди. Қолган барча номзодлар Имомали Раҳмоннинг гуруҳидан, – деди 11- октябр куни Душанбе шаҳрида матбуот анжумани берган Ойниҳол Бобоназарова.

Эслатсак, аввалроқ Ойниҳол Бобоназарова тарафдорларидан бир неча киши имзо тўплаётган пайтда полиция томонидан тазйиқларга учрагани ва ҳибсга олинганини билдирган эди.

Тожикистон Ислоҳотчи кучлари бирлашамасининг ягона номзоди Ойниҳол Бобоназарова ўтган асрнинг 90-йиллари бошида Тожикистон Демократик партиясига асос солганлардан биридир.

1993 йили Ватанга хиёнат ва давлат тўнтаришни уюштирганликда айбланиб, ҳибсга олинган Ойниҳол Бобоназарова халқаро ҳамжамият талаби асосида кўп ўтмай қўйиб юборилди.

Тожик жамиятида илк сиёсий маҳбус саналган Ойниҳол Бобоназарова узоқ йиллардан буён инсон ҳуқуқлари масаласида фаолият қилиб келмоқда. У бошлиқ Переспектива+ нодавлат ташкилоти республика ҳибсхоналаридаги вазъият, маҳбусларга нисбатан қўлланилаётган ноинсоний муносабатларни мониторинг қилади.

Ислоҳотчи кучлар уюшмаси ягона номзоди, таниқли ҳуқуқ фаоли Бобоназарова хоним ҳуқуқ-тартибот идоралари ўзининг сайловолди кампаниясига тўсқинлик қилганини билдирган.

“Имзо тўплаш жараёнида амалдаги ҳукумат рақибларидан қўрқиши яққол сезилди ва исботланди. Зотан бу босқичда ғирромлик бошланиб кетди. Имомали Раҳмон президентликка сайловда шаффофликни таъминлашга ваъда берган эди, лекин у сўзида турмади, деди сайловолди компаниясида кузатилган қонунбузарликларга тўхталиб Бобоназарова хоним.

Ойниҳол Бобоназарованинг сайловолди шатаби маълумотларига кўра, имзо тўплаш жараёнида республика бўйлаб 8 минг киши сафарбар қилинган эди.

“Айниқса республикаТоғли Бадахшон вилоятида ташаббус гурҳининг иши республика бошқа вилоят ва туманларидагидан оғирроқ кечди. Миллий хавфсизлик қўмитаси ва Ички ишлар вазирлиги халқни чўчитиш мақсадида турли тадбирлар ўтказди. Улар аҳолига психологик босимлар ўтказди, дея билдирган сайловолди шатб раиси Махмадали Ҳайит бугун эрталаб маҳаллий хабар агентликларига берган интервьюсида.

Марказий  сайлов комиссияси раиси Абдураҳмон Додоев президентликка номзод Ойниҳол Бобоназарованинг ноябр ойида бўладиган сиёсий тадбирда қатнашмаслигига муносабат билдириб қуйидагиларни гапирди:

“Сайловолди компаниясининг илк босқичида қонунга амал қилинди. Бунинг учун барча имкониятларни яратдик. Жумладан имзо тўплаш учун вақтни узайтиришга оид таклиф бажарилди. 11 октябр эрталаб Ойниҳол Бобоназарованинг сайловолди шатаби имзоларни тақдим этади, дея умид қилгандик. Бироқ энг охирги соатларда улар етарлича имзо тўплай олмагани маълум бўлди,- дейди тожик расмийси Додоев.

Марказий  сайлов комиссияси расмий маълумотига кўра, Тожикистон Коммунистик партиясидан номзод Исмоил Талбаков, Социалистик партия номзоди Абдуҳалим Ғаффоров, Демократик партия номзоди Саиджафар Исмонов, Иқтисодий ислоҳотлар партияси Олим Бобоев, Тожикистон Аграр партияси академик Толиббек Бухориев ҳамда ҳукумрон Халқ Демократик партиясидан номзод Имомали Раҳмон келаси ойда ўтказиладиган сайловда номзод сифатида қатнашиш учун рўйхатга олинган.

Иқтидордаги президент Имомали Раҳмоннинг номзодлиги ўтган жума куни илгари сурилган эди.

Зулфия