Қуръон оятларини қўл телефонига юклаб олган тожикистонлик тожир Ўзбекистонда тутқин бўлди

Қуръон оятларини қўл телефонига юклаб олган тожикистонлик тожир Ўзбекистонда тутқин бўлди
97 views
20 October 2013 - 11:08
Zubayd_ayat TJ v UZB zaderjan

Зубайд Мирзораҳимов

Душанбе шаҳар фуқароси Зубайд Мирзораҳимов Ўзбекистон Миллий хавфсизлик қўмитаси ходимлари томонидан ҳибсга олинган. Бунга унинг қўл телефонидан Қуръон оятлари топилгани сабаб бўлган.

20 сентябр куни Ўзбекистон ҳудудида содир бўлган воқеадан роса бир ой ўтиб маҳаллий матбуот вакилларини хабардор қилган душанбелик Холмурод Мирзораҳимовнинг айтишича, ўғли Зубайд тижорат билан шуғулланган.

“Ўғлим Зубайд беш йилдирки тожир. У Ўзбекистон орқали Жанубий Кореяга ўтмоқчи эди. Ўзбекистон чегара постида томожнийлар уни назоратдан ўтказаётиб телефонидан Қуръон оятларини топиб, уни миллий хавфсизлик ходимларига топширган. Ёнида 20 минг АҚШ доллари миқдорида маблағ ҳам бор эди. Ўғлимнинг ҳеч қандай айби йўқ, нахотки оятларни телефонига запис қилиш ҳам жиноят бўлса?, дея билдирган маҳаллий журналистларга Холмурод Мирзораҳимов.

Мирзораҳимовлар оиласи ўғлини озодликка чиқариш ва ватанига қайтаришда амалий ёрдам кўрсатишни сўраб Тожикистон Ташқи ишлар вазирлигига ариза ёзган.

Тожикистон Ташқи ишлар вазири мазкур иш юзасидан Тошкентга нота юборгани маълум бўлди.

“Зубайд Мирзораҳимовнинг тақдири билан мунтазам қизиқиб турибмиз. Гап шундаки, Ўзбекистонда бу жараён узоқ кечади. Чунки Ўзбекистон Ташқи ишлар вазирлиги иш юзасидан республика тегишли идораларига ёзма мурожаат қилади ва жавоб кутади. Биз кеча Ўзбекистондаги элчихонамиз билан айни масалада боғланган эдик. Лекин улар ҳозирча ҳеч қандай жавоб йўқлигини маълум қилди”, дея билдирган Тожикистон Ташқи ишлар вазирлиги масъул ходимларидан бири “Азия плюс” ахборот агентлигига.

Тожик дипломати тожикистонликларни ҳар баҳоналарда ҳибсга олиш ва уларнинг маблағию, товарларини давлат ҳисобига мусодара қилиш, айрим ҳолларда узоқ йилларга қаматиш каби ҳодисалар сўнгги йиллар республиканинг Ўзбекистон билан чегара постларида тез-тез қайдга олинаётганини билдирган.

Кузатувларга кўра, сўнгги ўн йил мобайнида Ўзбекистон билан Тожикистон ўртасидаги муносабатларнинг совуқлашиши ортидан ҳар икки давлат чегараларида йўловчиларни таҳқирлаш ва ҳатто узоқ йилларга қамаш ҳолатлари одатий тус олмоқда.

“Ўзбекистон томондан ҳам, Тожикистон томонда ҳам аҳвол шу. Иккала томон чегарачиларида оддий йўловчиларга нисбатан қандайдир адоват борга ўхшайди. Юкингни титкилайди, икки соат уч соат балки ундан ҳам кўпроқ. У ҳавонинг иссиғими, совуғими у билан иши йўқ. Аёллар, ёш болалар роса қийналиб ўтаяпти чегаралардан. Яқинлариизнинг тўю азаларига қатнашишдан маҳруммиз. Ўзбек чегарачиларига сал гап қайтарсанг “сен экстримистсан, наркоти ташияпсан”, деб баъзида ҳатто “жосус!га чиқариб қаматиб юбораяпти, дейди тожикистонлик Сайёра исмли тожир аёл.

Мустақил таҳлилчилар фикрича, Ўзбекистон нафақат Тожикистон балки минтақадаги бошқа қўшнилари Қирғизистон, Туркманистон билан ҳам чегараларида мустаҳкамлаш ва қўриқлаш кучайтирган.

“Бунга президент Ислом Каримов юритаётган ёпиқ режим сабаб. “Каримов режими” ортидан шу кунларда ўзбек-тожик чегараларида бегуноҳ гўдаклар, аёллар миналарга учиб қурбон бўлаётир. Лекин негадир ҳалқаро ташкилотлар, БМТ ва бошқа шу каби инсон ҳуқуқларини ҳимоялаш вазифаси бўлган нуфузли ташкилотлар жим, дейди тожикистонлик мустақил таҳлилчи Зафар Суфий.

ЎХҲ хабар маркази.