КАРТОШКA

КАРТОШКA
69 views
31 October 2013 - 14:15

Автобус деразасидан қараб кетар эканман, янги ҳайдалган ерлар оралиғида беш-олтита, беш-олтитадан бўлиб картошка ковлаётганларга кўзим тушди.

-27 даги. ёмғирдан кейин ковлаймиз,-деган эди акам картошкасини сўраганимда.

Мана, ёмғир ҳам ёғиб ўтди, энди деҳқонлар картошка, сабзи, ловияларини йиғиб олишаяпти.
Қатор қилиб терилган оппоқ қоплар кишининг ҳавасини келтиради.
Тўғри, бу кунга етгунча деҳқон бечора не-не машаққатлар чекди. Ер сотиб олса уруққа пули йўқ, уруғ топса – дори, тракторга пул тополмайди. Уни чопиш, суғоришга вақт йўқ, пахтадан бўшамайсан.
Майлида, мана, йиғим-терим пайтига ҳам етганига шукур қилишиб ишлашаяпти.
–Худо баракасини берсин!-деб қўяман ичимда.
Ҳа, Худо баракасини берсин, ризқини бутун қилган бўлсин!
Ўша йили (2 йилча аввал) акамларникига борсам, акам анча тунд. Сабаби қор ёғаяпти. Картошка ковлангани ковлангандай, ковланмагани ковланмагандай қор остида қолипти. Нима қилишга ҳайрон.
– Қарзим бўлмагандаям майлийди!,дея -нолийди акам,- тўйга деб, Талгатдан қарз олиб турган эдим, картошкани сотиб узаман деб…
Акамнинг дардини тушуниб турибман.
Бир йиллик меҳнати, сарф-харажати куйиб кетаяпти. Унга қўшилиб ўзи ҳам куйиб кетаяпти.
-Эрта-индин кун очилиб кетади,-далда бераман мен,-кўпчилик бўлиб йиғиб оламиз…
Акам жим, ўзининг ўй-хаёллари билан банд.
Шу орада кеннойм кириб келади. Салом-аликдан кейин суюнчи сўрагандай:
-Чангтепади битта фермер ўзини осиб қўйипти,- дейди.
Акам унга савол назари билан қарайди.
– 20 гектар картошкаси қорнинг тагида қолиб кетибти бечоранинг!
Айтганимдай, эртасига кун очилиб кетди.
Индинига ер музи эримасдан акамнинг янги “приспособления”си билан картошка ковлашга тушиб кетдик. Бизнинг ўзбеклардан ўтадиган ихтирочи бўлмаса керак. Иккита эшакка уланадиган культиваторни тракторнинг орқасига арқон билан улаб, икки киши тракторнинг орқасидан картошка эгатидан босиб кетаверади. Ер остидаги картошкалар юзага чиқиб қолади, бу ёғи осон, икки-уч қават қўлқоп кийиб олиб қопларга тераверасан.
Тўғри, тушга яқин музлар эриб, шудгор лой-балчиққа айланади. Лекин картошкани йиғиб олса бўлади.
Шулар кўз олдимдан ўтар экан,”Бу ўзбекларнинг пешонаси бунчалик шўр бўлмаса”, деб ўйлайман.
21-асрда ноиложликдан трактонинг орқасидан омоч етаклаб юрипти-я!.
Агар буни европаликлар кўрса юраклари ёрилиб кетса керагов! Ё ётволиб кулишармикан?
Ким билади.

Эркин Садр