Ўзбекистонлик меҳнат муҳожирларини Россиядан қувишяпти

Ўзбекистонлик меҳнат муҳожирларини Россиядан қувишяпти
50 views
07 November 2013 - 12:40

bf69391bdce75cdf7edcfb13862ea006Россиядаги “Мигрант Меҳнаткашлар Касаба уюшмаси” нинг билдиришича, сўнгги вақтлар Москва шаҳрига бораётган Ўзбекистон фуқароларини ёппасига депортация қилиш кўлами кенгайиб бормоқда.
Россия матбуотида 6 ноябр куни ёйинланган хабарларга кўра, Ўзбекистоннинг Бухоро, Андижон шаҳарларидан учиб келаётган самолётлардаги меҳнат муҳожирлари Москванинг Домодедово аэропортидаёқ ёппасига депортация қилинмоқда.
Ўзбек.ФМ таҳририяти бу маълумотларни текшириш мақсадида Москвадаги меҳнат муҳожирларига ҳуқуқий ёрдам кўрсатаётган мустақил ҳуқуқ фаоли Абдусамат исмли йигит билан боғланди.
– Кеча Бухородан Москвага учиб келган рейс самолётини қайтариб юборишган эди. Кейин Андижондан келган болалар ҳам ана шунақа қайтариб юборилаётгани ҳақида қариндошларига телефон қилиб айтишаяпти. Бу бўлаётган воқеа, — дейди Абдусамат.
Суҳбатдошнинг айтишича, келган самолёти билан орқага қайтариб юборилаётган ўзбекистонликлар ўз ҳуқуқларини ҳимоялашни сўраб ҳеч кимга шикоят қилмаяпти экан.
– Улар мурожаат ҳам қила олмайди. Чунки шу йилнинг май ойидан жорий қилинган янги тартибга кўра, Россия ҳудудида тартибни бузганлар келгуси уч йилгача бу мамлакатга кириш ҳуқуқидан маҳрум бўлади. Буни ҳаттоки ўша меҳнат муҳожиринин ўзи ҳам билмайди. Ватанига боради, яна қайтиб келганида эса Москва аэропортидан ташқарига чиқарилмайди. Яъни тартибни бузиб, уч йилгача Россиядан депорт қилингани ҳақида чегарачилардан билиб олаяпти, — дейди мустақил ҳуқуқ фаоли Абудсамат.
Марказий Осиё мамлакатлари, жумладан Ўзбекистондан Россияга бораётган меҳнат муҳожирларининг ёппасига ортга қайтарилаётгани ҳақидаги маълумотлар Россия Федерал миграция хизмати ва чегарачилари томонидан тасдиқланмагани баробарида инкор ҳам қилинмади.
Россия маъмурларининг билдиришича, Россия бўйлаб жорий қилинган янги тартиб бўйича, тахминан беш юз минг меҳнат муҳожири бу мамлакат ҳудудига қайтиб кириш ҳуқуқидан маҳрум қилинган.
Россия ФМС масъуллари бу рақам шу йил охиригача 1 миллионни ташкил қилиши мумкинлигини башорат қилаётир.
Ҳозирда Россия ҳудудида бемалол, яъни уч йилгача ишлаш ҳуқуқи минтақа мамлакатларидан фақат Тожикистон фуқароларига берилган.
Бу борада Россия ва Тожикистон ҳукуматлари октябр ойида ўзаро келишув имзолаган.
Эслатиб ўтамиз, ФМС маълумотига кўра, Россияда яшовчи марказий осиёликлар орасида тожикистонликлар сони 1,1 млн.ни, қирғизистонликлар — 544 минг, қозоғистонликлар 553 мингни ташкил қилади. Энг кўп сонли меҳнат мухожирлари эса Ўзбекистондан, улар 2,3 млнга яқин, аммо Ўзбекистон ҳукуматининг Россиядаги ўзбеклар тақдири борасида олиб бораётган фаол сиёсати кузатилмайди.

ЎХҲ ахборот бўлими