Яккабоғлик ҳуқуқбонга таъзйиқлар давом этадими?

Яккабоғлик ҳуқуқбонга таъзйиқлар давом этадими?
69 views
14 November 2013 - 11:28

13 ноябр куни Ўзбекистон Инсон Хуқуқлари Жамиятининг Яккабоғ тумани фаоли Жамолиддин Ортиқов чақирув хати орқали, тағин номаьлум сабаблар билан мазкур туманнинг ИИБ га чақиртирилган эди. Бу ҳақда ўтган галги хабаримизда маълум қилганмиз. Хўш, “қонун посбонлари” нима исташди экан? Жамолиддин Ортиқов ИИБ га чақирилиши сабабини қўйидагича изохлайди.

“Бир қўшним билан тортишиб қолгандим ва у ариза ёзган экан. Мени аввалига ИИБ га чақиришиб, сўнг судга олиб боришди. Судда яраштирув қилишди” – дейди Жамолиддин Ортиқов. Қаранг-а, бу мутлоқ  таниш бўлган эпизодга ўхшаб кетмаяптими? Куч ишлатар тизимларимиз шунчалик чаққон ишлашадики, улар ҳар томонлама текшириб кўришган, озгина бўлсада айб топишлари керак бўлган ва алол-оқибат топган ҳам кўринишади.

Бу арзимас қўшнилар тортишуви билан ИИБ га ариза ёзиб мурожаат қилиш аслида ўша қўшнининг хаёлига ҳам  келмагандир. Ҳар қалай, ҳуқуқ фаолимиз озодликда ва шунисига ҳам шукр қилайлик.

Яна шуни ҳам алоҳида таъкидлаб ўтишни истардик. Ўзбекистон жиноят кодексида шундай битилган.  Шахс ҳақорат билан аввал маьмурий жавобгарликга тортилган бўлса, шундан сўнг бу ҳатти-ҳаракатини тағин такрорлаб бирор шахсни хақорат қилса, ана унда жиноий жавобгарликга тортилади. Бу каби “яраштирув”, судга судрашдан кўзланган асосий мақсад эса мана бу: режим Жамолиддин Ортиқовга узундан – узун арқон ташлаб қўйди ва истаган вақтида уни йиғиштириб олиши мумкин. Тағин кимнидир ҳақоратлатиб, ёки “кўча жанжалини” уюштириш билан.

Жамолиддин Ортиқовнинг айби нима? Унинг айби, хаста жиянини пахта теримига юбормаганида. Шунинг учун унинг  Nexia русумидаги машинасини тортиб олишганди. Бугун эса, яъни 2013 йилнинг 14 ноябрь кунида, қўшниси билан тортишгани ва ўртада “ярашув акти” имзоланганидан сўнгина машинасини қайтариб беришди. Булар ҳаммаси унинг биргина ўша “айби” ортидан. Балки Жамолиддин Ортиққов жиянинг ҳаётини сақлаб қолгандир ва буни ўзи ҳам билмас. Аммо бу на ҳукумат учун ва на “қонун посбонлари” учун муҳим эмас.  Вазиятни кузатиб борамиз ва келгусида ҳуқуқбоннинг яна қандай саргузаштлар кутаётган бўлса, улар билан дунё ҳамжамиятини таништириб борамиз.

 

Гулшан Қораева

Ўзбекистон Инсон Ҳуқуқлари Жамияти Қашқадарё вилоят бўлими раиси