“ГРУЗ-200”

“ГРУЗ-200”
21 views
18 November 2013 - 16:59

2013 йил 15 ноябрь куни Қозоғистоннинг маҳаллий  вақти билан соат 16-00 да ўзбек-қозоқ чегараси кесишган жойда, “Қоплонбек” чегара пости орқали, Ўзбекистон фуқароси Жиззаx вилоятининг Зомин туманида 1990 йилда туғилган Зулфия Асророванинг жасади  олиб ўтилди.

Унинг яқин қариндошларининг сўзларига қараганда, Зулфия Россия Федерациясининг Москва шаҳрига ишга бундан 1 ой олдин борганди. У ерда асосан  кўчаларни супуриб,  фаррошлик қилар эди.  Ўзига бириктирилган  кўчаларнинг бирини тонг саҳарлаб супураётган вақтда, Россияда ишлаб чиқарилган, “Лада” автомобили  Зулфияни урган. Шу вақтнинг ўзида Зулфия Асророва оламдан ўтган.  “Лада” нинг эгаси эса  ёрдам қўлини чўзмай қочиб кетган.

Биз ўликни Москва шаҳрининг чеккасида жойлашган моргдан топдик. Унинг жасади ўша жойда 5 кун сақланган экан. Биз боргунимизча “ўликхона”дагилар унинг танасидаги бутун органларини олишган ва тананинг бўйин қисмидан то киндиккача, тикишган. Биз уни шу холда кўрдик.

Унинг жасадини Ўзбекистонга қайтариш жуда  қимматга тушди. Чунки Россия ва Қозоғистон йўналишлари бўйича қатнаётган оғир юк машинасига Зулфиянинг жасадини руслар тобутига солиб бирга олиб келдик. Таможнийда хужжатлаштириш жуда ҳам қимматга тушар экан. Биз Зулфия  Асророванинг жасадини олиб келиш учун  ўз ёнимиздан пул тўлаб, Ўзбекистонга олиб келдик. Аслида биз унинг тобутини самолиётда олиб келишни олдиндан режалаштирган эдик. Афсуски, бу режа амалга ошмади. Чунки, билет нарxлари  қиммат экан. Ўзбекистонга билетни долларда олиш керак экан.

Биз унинг ўликни “Қоплонбек” постида хужжатлаштириб, уйига олиб бориш учун “Дамас” автомобилини гаплашдик.  Жиззаx вилоятининг Зомин туманига олиб боргунимизча, 1 миллион сўмга тушди. Ўзимиз бошқа машиналарда кетдик. Зулфия Асророванинг жасади Россиядан то Ўзбекистонгача, 5 минг А.Қ.Ш. долларига тушди. Эскилар айтганидек: “йўл азоби, гўр азоби” деганлари шу бўлса керак…


Ф
ерузбек


ЎХҲ хабар
маркази