Мэрликка сайланиш учун номзодлар камида 23 депутатнинг овозини олиши шарт.   Ўш шаҳар кенгаши депутатлари чоршанба куни кўпчилик овоз билан Айтмамат Кадирбаевни мэр лавозимига сайладилар.Шаҳар кенгашидаги депутатларнинг 8 нафари ўзбекдир.Сайлов арафасида Ўш шаҳар кенгашидаги 8 ўзбек депутатини қўрқитиш ҳаракати бўлгани ҳақида хабар қилинган эди.

Ўш шаҳар марказий майдонида мэрликка номзод Мелис Мирзақматовнинг бир неча мингга яқин тарафдори митинг ўтказмоқда. Ўшдаги мухбиримизнинг хабар беришича, митингчилар орасида 60 га яқин отлиқ ҳам бор.

Митингда сўзга чиқаётганлар Ўш шаҳар кенгаши депутатларидан мэр сайлови адолатсиз ўтганини иддао қилишмоқда. Митингчилар наздида адолатли сайлов дейилганда Мелис Мирзақматовнинг мэрликка сайланиши назарда тутилади.

Митингчилар сайлов натижалари эълон қилингач, Ўш шаҳар ҳокимияти биносини босиб олишга даъват қилишди. Шаҳар ҳокимияти биносига тошлар отилди. Бироқ Мирзақматов ўз тарафдорларини сабрлиликка чақириб, тўхтатган. ҳозирда шаҳар ҳокимияти биноси махсус кучлар томонидан қаттиқ қўриқланмоқда.

Мелис Мирзақматов 2010 йилги Ўш қирғини пайтда шаҳар мэри лавозимида ишлаган. Қирғизистон ҳукумати уч йил давомида уни лавозимидан бўшатишга бир неча маротаба уринган, лекин бу уринишлар натижа бермаган эди.

Ўтган йилнинг 5 декабрида Мелис Мирзақматов Қирғизистон Бош вазири буйруғи билан ишдан олинган.

Сайлов муносабати билан Ўшда милиция кучайтирилган тартибда ишлашга ўтди.  Милиция вазиятни беқарорлаштиришга қаратилган эҳтимолий уринишларнинг олдини олиш ва жамоат хавфсизлигини таъминлашга тайёр эканини билдирган.

Сўнгги хабарларга қараганда шаҳар кенгаши йиғилиши ўтаётган ҳокимият биносини 400 га яқин милиция ходими қўриқламоқда.