Ўзбекистонда чет элликлар устидан назорат кучайтирилади

Ўзбекистонда чет элликлар устидан назорат кучайтирилади
47 views
27 March 2014 - 16:38

01Тошкент меҳмонхоналаридаги чет эллик фуқароларни назоратга олиш бўйича ИИВ турли хил семинарлар ташкил қилишни бошлади. Шулардан бири, Тошкент шаҳридаги «Гранд – Мир» меҳмонхона мажмуасида бўлиб ўтди.

Семинар Ўзбекистон ИИВ Хорижга чиқиш, келиш ва фуқароликни расмийлаштириш хизмати (ХЧК ва ФРБ) ходимлари ва пойтахтдаги меҳмонхоналар маъмурияти вакиллари билан биргаликда ташкил этилган.

Семинарда республика ИИВ ХЧК ва ФРБ бўлими бошлиғи, подполковник Қ.Зокиров, Тошкент шаҳар ИИББ ХЧК ва ФРБ бўлими бошлиғи, майор Қ.Йўлдошев ва бошқаларнинг маърузалари тингланган.

Тадбир давомида бизнес соҳаси ҳодимларига Ўзбекистонга келиб, меҳмонхоналарда яшаётган чет эл фуқароларини қайдга олиш ҳамда рўйхатдан ўтказиш тартиб-қоидалари тушунтирилган.

Шу билан бирга, семинар қатнашчиларига чет эл фуқароларини қабул қилиш тартибига қатъий риоя этилишида мансабдор шахсларнинг масъулиятлари ҳамда бу борадаги қоидаларни бузганликлари учун жавобгар бўлишлари алоҳида айтиб ўтилган. Хусусан, меҳмонхона маъмурлари ҳар куни келувчи чет эл фуқароларини қайд этиб боришлари, Тошкент шаҳар ИИББ манзил маълумот бюросига ҳамда паспорт хизмати бўлинмаларига тегишли маълумотлар, ҳисоботлар, бошқа зарур ҳужжатларни ўз вақтида тақдим этишлари лозимлиги эслатилган.

Тадбир сўнгида республика ҳуқуқни муҳофаза қилиш идоралари ходимлари томонидан паспорт-виза тартиботи бўйича, шу жумладан меҳмонхона ходимлари томонидан содир этилган тартиббузарликлар акс этган тасвир лавҳалари намойиш этилган.

ЎХҲ хабар маркази