Каримовга коллеж битирувчиларидан шикоят хати

Каримовга коллеж битирувчиларидан шикоят хати
123 views
01 May 2014 - 13:28

xat

“…биздан ҳамма воз кечмоқда, биз ҳеч кимга керак эмас эканмиз..”

Таҳририятимизга Олмалиқ шаҳридаги 17-сон касб-ҳунар коллежи талабалари томонидан президент Каримов номига ёзилган шикоят хати нусхаси келиб тушди. Шикоят хати бу йил коллежни битириш арафасида турган ўттизга яқин талаба номидан ёзилган.

“Биз, Олмалиқ шаҳар 17-сон касб-ҳунар коллежи битирувчилари Сизга бизнинг келажак тақдиримизда амалий ёрдам беришингизни сўраб мурожаат қилмоқдамиз. Мазкур йили биз касб ҳунар коллежининг электромеханик мутахассислигини эгаллаб, битириш арафасида турибмиз, бироқ бизни ҳеч ким ишга қабул қилмаяпди, биздан ҳамма воз кечмоқда, биз ҳеч кимга керак эмас эканмиз. Биз кимга, қаерга мурожаат қилишимиз керак, Нима қилмоғимиз керак? Ахир биз катта ҳаётга йўл қўйиш арафасида турибмиз!

Бизга болалигимиздан ҳақиқатга, қонун устуворлигига ишонишга ўргатишган. Президентимиз келажак биз – ёш авлод қўлида эканини таъкидлаган, у ҳамиша биз ҳақимизда қайғуришига ишонамиз! Лекин мутасадди кимсалар амалда қандай чора кўришяпди? Бизнинг тақдиримизга, келажагимизга бефарқ қарашмоқда.

Ушбу шикоят хат орқали Сиздан кас-ҳунар коллежини битиргач иш билан таъминлашда бизга амалий ёрдам кўрсатишингизни сўраб ишонч билан ёзмоқдамиз”, – дейилади хатда.

xat

Маълумки, президент Каримов 2013 йил якунларига бағишланган Ўзбекистон ҳукумати мажлисида қилган маърузада:

“Ўтган йили биз учун энг устувор вазифа бўлмиш касб-ҳунар коллежларининг 500 минг нафардан ортиқ битирувчиси иш билан таъминланди ва айтиш жоизки, бунинг аҳамиятини баҳолашнинг ўзи қийин. Ўз хусусий ишини очиб, бизнес билан шуғулланишга қарор қилган коллеж битирувчиларига 140 миллиард сўмдан зиёд имтиёзли микрокредитлар ажратилди”, – деб мақтанганди.

Кўриниб турибдики, қоғоздаги рақамлар ҳеч қачон Ўзбекистондаги реал воқеликни акс эттирмайди.

ЎХҲ ахборот бўлими