Ўзбекистонда парламент сайловлари 21 декабрда бўлиб ўтади

Ўзбекистонда парламент сайловлари 21 декабрда бўлиб ўтади
73 views
13 May 2014 - 13:27

parlament saylovlari12 май куни Ўзбекистон Республикаси Марказий сайлов комиссиясининг мажлиси бўлиб ўтди. Мажлисда шу йилнинг декабрида бўлиб ўтадиган парламент сайловларига тайёргарлик жараёнини бошлаш масаласи муҳокама қилинди. Бу ҳақда Марказий сайлов комиссиясининг расмий сайти хабар тарқатди.

Маълумки, Ўзбекистон Республикаси Конституциясининг 117-моддасига мувофиқ Ўзбекистон Республикаси Олий Мажлисига, халқ депутатлари вилоят, туман ва шаҳар Кенгашларига умумхалқ сайловлари жорий йил декабр ойи учинчи ўн кунлигининг биринчи якшанбасида бўлиб ўтади. Бу эса 2014 йилнинг 21 декабрь кунига тўғри келади.

Ўзбекистон Республикасининг қонунчилигига мувофиқ Ўзбекистон Республикаси Марказий сайлов комиссияси Ўзбекистон Республикаси Олий Мажлисига сайловни ташкил этади ва ўтказади.

Мажлисда 2014-йилда Ўзбекистон Республикаси Олий Мажлиси, халқ депутатлари вилоят, туман ва шаҳар Кенгашлари сайловига тайёргарлик кўриш ва уни ўтказиш бўйича тадбирлар дастури кўриб чиқилган.

“Дастур сайлов қонунчилиги қоидаларини сайловчиларга кенг тушунтириш бўйича ахборот-таҳлил ишларини самарали ташкил этиш учун шарт-шароитларни таъминлаш, миллий сайлов тизимини янада демократлаштиришнинг мазмун-моҳиятини тарғиб қилиш, сайловчиларнинг бўлажак сайловга мамлакатимиз ҳаётидаги энг муҳим ижтимоий-сиёсий воқеа сифатида тайёргарлик кўриш ва уни ўтказиш жараёнидан хабардорлигини ошириш, уларнинг ҳуқуқий маданиятини юксалтириш бўйича халқаро, республика ва минтақавий тадбирлар ўтказишни назарда тутади”, – дейилади хабарда.

Ўзбекистон қонунчилигига кўра мамлакатдаги навбатдаги президент сайловлари парламентга сайловлардан кейин 90 кун ўтиб бўлиб ўтади. Бундан келиб чиқиб Ўзбекистондаги навбатдаги президентлик сайловлари 2015 йилнинг 21-22 март кунлари бўлиб ўтиши кутилмоқда.

ЎХҲ ахборот бўлими