Масжид имоми лотерея сотиб олишга даъват қилмоқда

Масжид имоми лотерея сотиб олишга даъват қилмоқда
47 views
17 June 2014 - 16:35

AgrobankФарғона вилоятининг Олтиариқ туманидаги Полосон қишлоғи масжиди имоми жума намозини ўқиш учун масжидга келганларни лотерея сотиб олишга даъват қилди.

Мазкур хабарни етказган Полосонликларнинг сўзларига кўра қишлоқ имомининг исми Валижон бўлиб, қишлоқ одамлари уни Валижон хўрозвоз деб чақиришади.

“Жума куни жоме масжидига одамлар кўп келишгани учун одатда масжид дарвозаси олди пистачилар ва бошқа ҳар хил майда нарсалар сотувчилар билан тўлиб кетади. Бироқ ўтган жума куни масжид олдига бир машина  келиб устига лотерея қўйиб сотишни бошлади. Масжид имоми ўз маърузасини тугатар тугатмас одамларга қарата: …ва ахиру даъвана биродарлар ташқарида “Агробанк” томонидан чиқарилган лотерея сотиляпди 5000 сўмдан. Шундан олинглар “Малибу”,”Каптива” ва бошқа чиройли ютуқлар бор экан. Марҳамат ўйнанглар, деб қолса бўладими”, – дейди Полосонликлардан бири.

Ушбу хабарни тайёрлаётганимиз вақтда Озодлик радиоси ““Агробанк” ходими: “Фаровонлик” лотереясини сотиб олишга мажбурлашаяпти” сарлавҳаси остида хабар эълон қилди.

Демак, “Агробанк” лотереясини мажбурлаб сотиш ишига масжид имомлари ҳам жалб қилинган кўринади, балки ҳар масжидга лотерея сотиш бўйича норма ҳам белгилаб қўйилгандир.

ЎХҲ ахборот бўлими