Қирим-татарлари минтақадаги барча ҳокимият органларини тарк этади

Қирим-татарлари минтақадаги барча ҳокимият органларини тарк этади
19 views
16 July 2014 - 10:16

chubarov rossiya hakidaҚирим ҳукумати ярим оролдаги парламент сайловларини 14 сентябрга белгилади. Қирим-татарлари бу сайловларда қатнашмайди. Бундай қарор Украинанинг Херсон вилоятидаги Геническ туманида бўлиб ўтган қирим-татарлари Мажлисининг сайёр йиғилишида қабул қилинди.

Йиғилишда қирим-татарлари лидери Мустафо Жамил иштирок этди. Жорий йилнинг апрель ойида унга беш йил давомида Қирим ярим оролига кириш таъқиқлаб қўйилганди. Эндиликда россияпарастларнинг Қирим ҳукумати қирим-татарлари Мажлиси раиси Рефат Чубаровнинг ҳам киришини таъқиқлаб қўйишди, деб ёзади gazeta.ua.

– Сайёр мажлисда 25 одам қатнашди. Улардан учтаси сайловларда иштирок этиш учун овоз беришди, учтаси овоз беришмади ва қолган 19 одам сайловларга қарши овоз берди, дейди нашр муҳбири билан телефон орқали суҳбатда қирим-татарлари Мажлиси раиси ўринбосари Наримон Жалолов.

“Бу бизнинг Қирим ҳукумати билан тил топишга уринишларимизнинг самарасиз якунлангани натижасидир. Улар биз билан келишувларнинг биронтасини бажаришмади. Мустафо Жамил ва эндиликда Рефат Чубаровларнинг Қиримга киришига таъқиқ қўйишди. Мажлиснинг барча аъзолари ва бизга ёрдам бераётган тадбиркорлар ҳақида маълумот йиғишмоқда. Шунинг учун ҳам биз ўз одамларимизга лавозимларини тарк этишларини тавсия қилдик. Агар кимдир ўз лавозимида қоладиган бўлса, фақат ўзигагина вакиллик қилади, бизнинг тузилмаларимизга эмас.

Ҳозирда қирим-татарлари Мажлисини эктремистик ташкилот деб эълон қилишмоқчи эканлиги ҳақида гап-сўзлар тарқалган. Бундан бир ярим ойча илгари Эски Қиримдаги мусулмонларни милиция бўлимларига чақиришди. Уларни сўроқ қилиб бармоқ изларини олишди. Сиферополдаги диний болалар ўқув даргоҳига бостириб кириб таъқиқланган адабиётларни излашди.

Баъзилар аллақачон Қирим Россиянинг бир бўлаги эканига кўникишди. Совет давридаги каби ошхона сиёсатига ўтиш даври бўлмоқда. Россия Федерациясида ўйлаган нарсангни гапира олмайсан. Уйда дўстлар билан ниманидир муҳокама қилиш мумкин, оммавий норозиликлар эса жиддий муаммоларни келтириб чиқариши мумкин.

Қирим парламенти Украина фуқаролиги сақлаб қолганларнинг ҳаётини янада оғирлаштириш ҳақида ўйламоқда. Лавозимларга, хусусий мулкка ва тадбиркорлик фаолиятига нисбатан таъқиқлар бор. Фақат Россия фуқароларигагина таълуқли бўлган тиббий суғурта жорий қилинмоқда. Одамларни Украина фуқаролигидан воз кечишга мажбур қилишмоқда. Мажлис фаолияти тугатилишига асос яратмаслик учун, Қирим ҳудудида амалда бўлган қонунлар доирасида фаолият юритамиз. Бунинг учун Украина бизни танқид қилмаслиги лозим”, – дейди Жалолов.

ЎХҲ ахборот бўлими