Украина русларни санкция билан жазоламоқчи

Украина русларни санкция билан жазоламоқчи
51 views
24 July 2014 - 15:51

imagesУкраина бош вазири санкция қўлланиладиган россия фуқаролари ва компаниялари рўйхатини тузишни буюрди, деб хабар берди «ASIA-Plus».

“Мен санкция чораларини тайёрлаш бўйича қўмитага Украинада терроризмни қўллаб қувватлайдиган ва молиялаштирадиган ҳамда Украинанинг мустақиллиги ва ҳудудий яхлитлигини бузадиган Россия Федерациясининг жисмоний ва юридик шахсларига қарши шахсий ва соҳавий санкциялар рўйхатини ўн кун ичида ҳукуматга тақдим қилишга буйруқ берди”, – дейди Яценюк, Украина Вазирлар Маҳкамаси мажлисини очиб берган нутқида.

Унинг сўзларига кўра, Киев “Терроризмни молиялаштиришга қарши кураш тўғрисида”ги халқаро конвенция нормалари бузилганлиги сабабли Москвага расмий нота жўнатилган.

Бош вазирнинг таъкидлашича, Россия бўлгичиларни молиялаштириб ҳамда уларга қурол етказиб бериб бевосита Украинадаги терроризмни қўллаб-қувватламоқда.

“Украина Россия Федерациясидан жўнатилган нотага зудлик билан жавоб беришини талаб қилади. Конвенция талабларига кўра, якуний қарор БМТ Халқаро суди томонидан қабул қилинади”, – дейди Украина бош вазири.

Бундан ташқари, Россия бир неча маротаба Украина жанубий-шарқидаги воқеаларга умуман алоқаси йўқлигини, хусусан, Украина ҳудудида ҳеч қандай махсус хизмат жосуслари ёки россия аскарлари кирмаганлигини таъкидлаган.

Россия ТИВ бошлиғи Сергей Лавровнинг сўзларига кўра Россияга нисбатан Украина жанубий-шарқида вазиятни беқарорлаштириш билан боғлиқ қўйилаётган айбларда асос йўқ. Мудофаа вазирлиги ҳам исёнчиларга ҳеч қандай ҳарбий техника, қурол-аслаҳа ва бошқа ёрдам етказиб бермаётганини бир неча маротаба маълум қилган.

22 июль куни Оврўпа Иттифоқи аҳзо давлатлари ташқи ишлар вазирлари Украинадаги вазият туфайли Россияга қарши янги чекловчи чораларни ишлаб чиқиш жараёнини тезлаштиришга келишиб олишди. Оврўпа дипломатияси бошлиғи Кэтрон Эштоннинг таъкидлашича, Брюссель Россиянинг тўлиқ ҳамкорлигига гувоҳ бўлмаса зудлик билан янги санкцияларни қўллашга тайёр.

Эштоннинг сўзларига кўра, ОИ ўтган ҳафта бўлиб ўтган саммитда келишилган аниқ чораларни ишлаб чиқиш жараёнини тезлаштиришга қарор қилган. Хусусан, унинг айтишича, тез орада санкциялар рўйхати жисмоний шахслар ва компаниялар, жумладан россиялик жисмоний ва юридик шахслар билан тўлдирилади.

23 июль куни ОИ Россиянинг молия бозорларига кириш ва юқори технология махсулотларига эга бўлишини чекловчи чоралар бўйича таклифларни тақдим қилди.

Мазкур чоралар жорий ҳафтада Malaysia Airlines компаниясига тегишли самолётнинг Украина шарқида ҳалокатга учраганлиги бўйича БМТ Хавфсизлик Кенгаши резолюцияси асосида текширув ўтказилишига Россия тўсқинлик қиладиган тақдирда қўлланилади.

ЎХҲ ахборот бўлими