Ўзбекистонда денгиз йук, аммо денгиз тартиби бор

Ўзбекистонда денгиз йук, аммо денгиз тартиби бор
24 views
04 August 2014 - 14:16

4

Вазирлар Маҳкамасининг 2014 йил 29 июлдаги Қарори билан ҳорижий ҳарбий бўлмаган ва ҳарбий кемаларнинг Ўзбекистон Республикаси ички сувларига, портларига кириши ва уларда бўлиш тартиби тўғрисидаги Низом тасдиқланди.

Ушбу Низом ҳорижий ҳарбий бўлмаган ва ҳарбий кемаларнинг тинч мақсадларда Ўзбекистон Республикасининг ҳудудий сувлари орқали ўтишини ҳамда Ўзбекистон Республикаси ички сувларига, портларига кириши ва уларда бўлиш тартибини белгилайди.

Хусусан, Низомга кўра, ҳорижий ҳарбий бўлмаган ва ҳарбий кемалар Ўзбекистон Республикасининг ички сувлари ва портлари орқали сузиб ўтишда ва уларда бўлишда ўзининг ҳарбий-денгиз ёки давлат байроғини кўтарган бўлиши лозим.

Бундан ташқари, бундай кемалар, Ўзбекистон Республикасининг чегара, божхона, солиқ (фискал), санитар, иммиграциявий, ветеринар, фитосанитар, навигацион, радиоалоқа режимига амал қилиш, ахборот алмашиш ва бошқа қоидаларига риоя қилишлари лозим.

Ўзбекистон Республикаси ички сувларига, портларига кириши ва уларда бўлишда ҳорижий ҳарбий бўлмаган ва ҳарбий кемаларга қуидаги фаолият турлари билан шуғулланиш таъқиқланади:

– Ўзбекистон Республикасининг суверенитети, ҳудудий яхлитлиги ёки сиёсий мустақиллигига қарши куч билан таҳдид қилиш ёки уни қўллаш ёҳуд ҳар қандай шаклда халқаро ҳуқуқ принципларини бузиш;

– Ҳар қандай турдаги қуроллар билан турли манёврлар ёки ўқув машғулотлари ўтказиш;

– Ўзбекистон Республикасининг мудофаа ва хавфсизлигига зарар етказадиган маълумот йиғишга қаратилган ҳар қандай фаолият;

– Ўзбекистон Республикасининг мудофаа ва хавфсизлигига тажовуз қилиш мақсадидаги ҳар қандай тарғибот фаолияти;

– чегара қўшинларининг рухсатисиз ҳар қандай юк ва моддий бойликларни тушириш ёки юклаш ёҳуд ҳар қандай шахснинг кемадан тушиши ёки чиқарилиши;

– атроф-муҳитга қасддан ва жиддий зарар етказиш билан боғлиқ фаолият;

– овчилик билан боғлиқ ҳар қандай фаолият;

– тегишли рухсатномасиз тадқиқот ва гидрографик фаолият билан шуғулланиш;

– Ўзбекистон Республикасининг алоқа тизими ёки бошқа иншоотлари ёҳуд қурилмаларининг ишлашига тўсқинлик яратишга йўналтирилган ҳар қандай фаолият;

– йўлакдан фойдаланишга бевосита алоқаси бўлмаган ҳар қандай фаолият;

– олдиндан маълум қилинган алоқа воситаларидан ташқари радиотехник ва гидроакустик воситалар, лазерлар ҳамда тўлқин тарқатувчи бошқа фаол манбалардан фойдаланиш;

– қирғоқдаги ҳарбий кемалар ва ҳарбий объектларни расмга ва бошқа бир шаклда суратга олиш;

– тўхташ жойини, порт иншоотлари ва тизимидан фойдаланишни ўзбошимча ўзгартириш;

– сувга шахсларни ва прредметларни тушириш ҳамда сув остидаги ҳар қандай фаолият;

– Ўзбекистон Республикаси миллий қонунчилигига зид бўлган ҳар қандай фаолият.

Ҳорижий ҳарбий бўлмаган ва ҳарбий кемаларда фавқулотда вазият юзага келганда уларга чегара қўшинлари томонидан ички сувларда қолиш муддати тугагунига қадар Ўзбекистон Республикаси портлари ва ҳудудий сувларини тарк этиш таклиф қилиниши мумкин.

ЎХҲ ахборот бўлими