Татар ёшлари президент лавозими йўқ қилинишига қарши

Татар ёшлари президент лавозими йўқ қилинишига қарши
13 views
09 August 2014 - 10:21
3

Ташкилот аъзолари Татаристон ижтимоий-сиёсий ҳаётида фаол иштирок этишади

Бутун дунёдан Қозон шаҳрига йиғилган татар ёшлари Татаристон Республикаси президенти лавозимининг сақланиб қолишини талаб қилиб очиқ мурожаат билан чиқишди.

“Сўнги пайтларда Татаристон Республикаси Президенти лавозимининг қайта номланиши борасида қизғин мунозаралар бўлмоқда. Кўпчилик Татаристонда президентлик институтининг тугатилиш хавфидан ҳавотирда – дейилади мурожаатда. – татар ёшларининг VI Бутунжаҳон Форуми иштирокчилари бир овоздан қуйидагиларни маълум қилади: Россия Федерацияси Конституцияси Татаристон Республикасини давлат сифатида ҳамда республика бошқарув органлари унинг халқи томонидан шакллантирилишини тан олади. Ўз навбатида мамлакат Конституциясига зид бўлган қонуннинг қабул қилиниши жамиятда кескин норозилик уйғотади”.

“”Татаристон Республикаси президенти” атамаси Республика халқи томонидан танланган. Шундай экан, демократия шароитида халқ иродасини ҳисобга олмаган ҳолда қабул қилинган қарор ҳуқуқий асосга эга бўла олмайди”, – деб ҳисоблайди татар ёшлари.

“Алоҳида сиёсий аҳамиятини инобатга олган ҳолда, татар жамоатчилиги ва жамоат ташкилотларининг Татаристон Республикасида президентлик институти мақомини сақлаб қолиш ва Россия Федерациясида федерализм тамойилларининг ривожланиши бўйича ташаббуси қўллаб қувватлансин”, – дейилади ҳужжатда. Мазкур банд форумнинг якуний резолюциясига ҳам киритилди.

Бундан ташқари татар ёшлари татарлар зич бўлиб яшайдиган йирик минтақаларда татар тилига расмий (давлат) мақом берилиши ташаббусини ҳам илгари суришди.

Ўз ташаббусларини қўллаб-қувватлаш мақсадида ёш фаоллар интернетда эълон қилинган петиция остида имзо йиғишни бошлашди.

Маълумот ўрнида айтиб ўтиш лозимки, татар ёшлари Бутунжаҳон форуми 2004 йили ташкил қилинган. Шу йили Татаристон ва Россия Федерациясининг бошқа минтақалари ва дунёнинг 16 давлатидан келган 484 та делегат иштирокида унинг биринчи съезди бўлиб ўтганди. Ушбу халқаро ташкилотнинг Форуми икки йилда бир маротаба ўтказилади. Унинг мақсади ёш авлод учун она тили ва ўз маданиятини билиш каби татар миллий қадриятларини етказиб бериш йўлларини излашдан иборат. Татар ёшларининг VI Бутунжаҳон Форумида дунёнинг 25 давлатидан ҳамда Россия Федерациясининг 42 та минтақасидан ва Татаристон Республикаси туманларидан келган жами 600 та делеган иштирок этди. Бугунги кунда Форум дунё бўйлаб ёшларнинг юзга яқин жамоат, диний ва маданий ташкилотларини бирлаштиради ва уларнинг фаолиятини мувофиқлаштириб боради.

ЎХҲ ахборот бўлими