“Ўзнефтмахсулот”: мамлакатда бензин тақчиллиги йўқ

“Ўзнефтмахсулот”: мамлакатда бензин тақчиллиги йўқ
119 views
14 August 2014 - 13:12

2“Ўзнефтмахсулот” ўз расмий мурожаатида Ўзбекистондаги ёқилғи қуйиш шаҳобчаларида бензин тақчиллиги билан боғлиқ ажиотаж яратмасликка чақирди.

“…сўнги пайтларда республикадаги баъзи ёқилғи қуйиш шаҳобчаларида, шу жумладан Тошкент шаҳрида ҳам автобензин олишда навбат юзага келмоқда. Бу эса мамлакат аҳолиси орасида тушунмовчиликни юзага келтирмоқда ва ҳавотир уйғотмоқда. Натижада хом ашё етишмовчилиги ва махсулотни қайта ишлаш билан боғлиқ асоссиз миш-мишлар пайдо бўлмоқда. Бу гап-сўзлар ҳақиқатдан йироқдир”, – дейилади мурожаатда.

“Ўзнефтмахсулот” акциядорлик компанияси республикада ёқилғи махсулотлари билан боғлиқ ҳеч қандай муаммо йўқлигини даъво қилади.

“Республикамизда халқаро стандартларга жавоб берувчи ёқилғи-мойлаш махсулотларининг барча турлари узлуксиз ишлаб чиқарилмоқда”, – дейилади “Ўзнефтмахсулот” мурожаатида.

Маълумки ҳар йили Ўзбекистонда пахта мавсуми бошланган пайтда бензин ва дизел ёқилғилари ҳосилни йиғиб териб олишга сафабар этилиши натижасида куз ойларида тақчиллик пайдо бўлиши кузатилади.

Бироқ нефт маҳсулотлари таъминоти учун масъул идоралар ҳудудлар учун ажратиладиган бензин ёки дизел ёқилғиси ҳажми камаймаганини таъкидлаб келишади.

Таҳлилчиларнинг фикрича, ёқилғи тақчиллиги юзага келишига Ўзбекистонга четдан нефт маҳсулотларини импорт қиладиган ширкатлар дуч келган муаммолар ҳам сабаб бўлиши мумкин. Бу ширкатларнинг кўпчилиги ўзларининг сўмдаги даромадларини конвертация қилишда муаммоларга дуч келишади.

Ушбу ширкатлар яна Ўзбекистонга маҳсулот олиб киришлари учун Россия ёки Қозоғистондаги ишлаб чиқарувчиларга пул тўлашлари лозим, бироқ расмийлар тушунтириш бермаётган сабабларга кўра, импортчи ширкатларнинг сўмлари қаттиқ валютага алмаштирилиши жиддий муаммо саналади. Натижада айрим ширкатлар буткул фаолиятини тўхтатишига тўғри келган, айримлари эса импортни кескин чегаралаган.

ЎХҲ ахборот бўлими