Гулноранинг шериклари амнистияга тушиш эҳтимоли кам

Гулноранинг шериклари амнистияга тушиш эҳтимоли кам
17 views
25 August 2014 - 12:58

6Гулнора Каримованинг қамоққа олинган бизнес шериклари Рустам Мадумаров ва Гаянэ Авакянларнинг суд ҳукми устидан шикоятлари қондирилмаган. Бу ҳақда Би-би-си ўзбек хизмати хабар берди.

Хабарда таъкидланишича, шу ой бошида Тошкент апелляцион маҳкамаси Мадумаров ва Авакянга қарши июл ойида чиқарилган узоқ муддатли қамоқ жазоларини кучда қолдирган.

Ўзбекистон Бош прокуратураси Рустам Мадумаров ва Гаянэ Авакянларни қатор иқтисодий жиноятлар, жумладан, солиқ ва валюта жиноятларида айблаган. Расмий хабарда айбланганларнинг шу йил февралида терговга мажбуран олиб келингани айтилганди.
Июл ойида Гулноранинг яқин ҳамкори ва фуқаровий эри экани айтилган Мадумаровга 10 йиллик қамоқ жазоси берилган. Аммо суд залида умумий авф қўлланиб, жазонинг учдан бир қисми бекор қилинганди.

Гаяне Авакян эса бошида 9 йилга ҳукм этилган, аммо умумий авф қўлланилиб, 6 йиллик қамоқ жазоси тайинланганди.

Би-би-си манбасининг билдиришича, икковлон эндиликда 1 сентябрь – Мустақиллик куни муносабати билан эълон қилинадиган амнистия рўйхатига тушишга умид қилишмоқда.

Мазкур тергов иши билан таниш бўлган терговчининг анонимлик шарти билан Би-би-сига айтишича, икковлоннинг амнистияга тушиш имкониятлари оз кўринади.

“Мен тажрибамдан биламан, агар амнистия қўлланиладиган иш бўлганда, бу маҳкама ишини бошлаб ўтиришмасди ва маҳкама иши бўлиб ўтмасди”, – дея терговчи сўзларидан иқтибос келтиради Би-би-си.

“Дадо” гуруҳи хонандаси бўлган Рустам Мадумаров ўтган йиллар давомида Гулнора Каримова билан жуда яқин тижорий ва шахсий муносабатларда бўлган. Гаяне Авакян эса бир неча Оврўпо давлатларида бошланган пул ювишга оид ишларда номи тилга олинган шахс бўлиб, Гулнора Каримовага боғлиқ тижоратларни юритгани даъво қилинади.

21 август куни Би-би-си ўзбек хизмати Гулнора Каримованинг аудиомурожаатини эълон қилганди. Аудиога ёзилган овоздан тушуниш мумкинки, Каримова инглиз тилида жавоатчиликка мурожаат қилиб бугунги кундаги ўз ҳаётини тасвирлаган. Гулнора Каримова ўзи ва қизининг уй қамоғида итлардан ҳам баттар шароитда сақланаётганини иддао қилади.

ЎХҲ ахборот бўлими