“Googoosha”нинг Хоразмдаги эркатойи қочдими ё қамалдими? УрДУ ректори ғойиб бўлди.

“Googoosha”нинг Хоразмдаги эркатойи қочдими ё қамалдими? УрДУ ректори ғойиб бўлди.
26 views
30 August 2014 - 17:47

Ал-Хоразмий номидаги Урганч давлат университети (УрДУ) ректори, Хоразм Маъмун академияси раиси, биология фанлари доктори Рўзимбой Эшчонов бир ҳафта-ўн кундан бери уйида ҳам, ишида ҳам йўқ.

Унинг сирли равишда ғойиб бўлиши турли миш-мишларнинг пайдо бўлишига замин яратмоқда. Баъзи гап-сўзларга қараганда, Эшчонов пора олганликда ва катта миқдордаги пулларни ўзлаштирганликда гумонланиб, вилоят МХХ ходимлари томонидан ҳибсга олинган. Бошқа миш-мишларга кўра эса, ҳибс хавфи ҳақида номаълум киши томонидан огоҳлантирилган ректор мамлакатни тарк этишга улгурган.

rektor

Рўзимбой Эшчонов

Хоразм вилоят прокуратурасидаги манбанинг айтишича, Рўзимбой Эшчонов ҳақидаги миш-мишлардан фақат биттаси ҳақиқат: маҳаллий прокуратура ва МХХ унинг устидан ростдан ҳам қўшма жиноий иш очган.

“МХХ тақдим этган маълумотларга кўра, Эшчонов катта миқдорда пора олиб, ноқонуний даромадларини Европадаги банкларда сақлаб келган. Бундан ташқари, Франция, Бельгия ва Швейцарияда қимматбаҳо вилларларни ҳарид қилган”, – дейди прокуратура ходими.

Унинг айтишича, МХХ ва прокуратура Рўзимбой Эшчоновнинг жиноятлари ҳақида олдиндан билиб келган, фақат ректорнинг “орқаси” бўлмиш Гулнора Каримовадан чўчиб, “домла”га қарши бирор ҳаракат қилмаган. “Эшчоновни Гулнора Каримова ҳимоя қилар эди. Гулнора Каримова ҳар сафар Хоразмга келганда Эшчонов унга ҳамроҳлик қилар ва муносабатларини мустаҳкамлаб борар эди. “Опа”сига ишонган ректор ўз лавозимини суистеъмол қилишга одатланган эди. Охирги йилларда Эшчонов ўзи ёқтирмаган ўқитувчиларга қарши жиноий иш очиб, уларни қаматиш ишларини авжига чиқарганди. Масалан, бундан икки йил олдин Эшчоновнинг тақдимоти бўйича вилоят махсус хизматлари университетнинг араб тили ўқитувчисига қарши жинойи иш “ясаб”, тилшуносни диний экстремизм ғояларини тарғиб қилганликда айблади ва қамашга эришди. Туҳмат билан қамалган бечора ўқитувчи аслида бошқа нарса – меҳнат таътили вақтида ишга чиқишдан бош тортгани учун Эшчоновнинг ғазабига учраганди”, – дея ҳикоя қилади Хоразм прокуратурасидаги манба.

Рўзимбой Эшчонов УрДУ ректори лавозмига 2007 йил январ ойида тайинлаган эди. Шу йил март ойидан эътиборан эса ўриндошлик асосида Хорзам Маъмун академияси раиси лавозимида ҳам ишлаб келган.

ЎХҲ ахборот бўлими