Оврўпанинг энг сўнги авиакомпанияси ҳам Ўзбекистонни тарк этди

Оврўпанинг энг сўнги авиакомпанияси ҳам Ўзбекистонни тарк этди
48 views
11 September 2014 - 14:19

6Бугун Czech Airlines чех авиакомпанияси жорий йилнинг 24 октябридан Ўзбекистонга парвозларнинг тўхтатилишини маълум қилди. Бу ҳақда авиакомпания вакили сўзларига таяниб РИА Новости агентлиги хабар тарқатди.

“24 октябрь куни Прагадан Тошкентга сўнги парвоз амалга оширилади. Шундан сўнг биз Ўзбекистондаги ваколатхонамизни ҳам ёпамиз”, – дейди агентлик суҳбатдоши. Унинг сўзларига кўра, Ўзбекистонга парвозларнинг тўхтатилиши мазкур йўналишнинг даромад келтирмаслиги билан боғлиқдир.

Czech Airlines Ўзбекистонга парвозларни 2009 йилдан амалга ошира бошлади. 2012 йилда компания Ўзбекистонда ўзининг ваколатхонасини очди. Ҳозирги вақтда авиаташувчи Прога-Токент йўналиши бўйича А-319 аэробусида ҳафтасига икки марта парвозни амалга ошириб келмоқда.

Чехия авиакомпанияси Ўзбекистондан кетишга қарор қилган энг сўнги Оврўпа авиаташувчиси ҳисобланади.

Эслатиб ўтамиз, аввалроқ молиявий ва логистика сабабларига кўра Lufthansa, AirBaltic ва бошқа авиакомпаниялар Ўзбекистонга парвозларни амалга оширишдан бош тортишганди.

Бугунги кунда Ўзбекистонда ҳорижий авиакомпаниялар сифатида Россия, Қозоғистон, Қирғизистон, Хитой, Жанубий Корея ва Туркия авиакомпаниялари парвозларни амалга ошириб келмоқда.

Яқин ва узоқ ҳорижга фуқароларни ташиш бўйича умумий ҳажмнинг асосий қисми тўлалигича давлатга тегишли бўлган монопол ташувчи – “Ўзбекистон ҳаво йўллари” Миллий авиакомпанияси ҳиссасига тўғри келади.

ЎХҲ ахборот бўлими