Ўзбекистондаги бензин инқирози ортидан АЁҚШ сотувчилар кўпайди

Ўзбекистондаги бензин инқирози ортидан АЁҚШ сотувчилар кўпайди
27 views
18 October 2014 - 1:24

2

Бир неча кундир Ўзбекистонда бўлаётган бензин инқирози туфайли пойтахтдаги ёқилғи қуйиш шаҳобчаларида километрлаб навбат юзага келди. Тошкент шаҳридаги бензин тақчиллиги билан боғлиқ ҳолат ва юзага келган узундан узоқ навбат ҳақида бир нечта нашрларда хабарлар берилди.

Хусусан, “Озодлик” радиосига хабар йўллаган муштарийларнинг ёзишича Тошкентдаги ёқилғи шаҳобчаларининг кўпчилигида бензин мутлақо йўқ. Бензин бор шаҳобчаларда эса юзлаб машиналар навбат кутмоқда. Аммо бу шаҳобчаларда ҳам бензин оз бўлгани учун, соатлаб навбат кутган айрим ҳайдовчилар қуруқ қайтишга мажбур бўлаяпти.

Ўзбекистонликлар орасида машҳур бўлган Facebook тармоғидаги Потребитель.уз гуруҳида эса “Бензинга навбатимни сотаман ёки сиз учун навбатда туриб бераман (1 соати 15000 сўм)”, деган эълон пайдо бўлди.

Айни пайтда ёқилғи қуйиш шаҳобчаларида йўқ бензин қўлда 3200 сўмдан сотилаётгани ҳақида хабарлар пайдо бўлди.

Бензин тақчиллиги пойтахт Тошкентда ёқилғи шаҳобчаларидаги узун навбатни пайдо қилган бўлса вилоятларда умуман бошқа вазиятни юзага келтирди.

Хусусан, Хоразм вилоятидаги манбамизнинг сўзларига кўра одамлар ёқилғи қуйиш шаҳобчаларидан бензин олиш умиди узган. Қўлда эса бензиннинг нархи 3600 сўмга чиққан. Бундан ташқари манбамиз вилоятдаги хусусий ёқилғи қуйиш шаҳобчаларининг инқирозга учраганидан бахс этади.

Унинг сўзларига кўра ҳозирда Хоразм вилоят телеканаларида мунтазам бериб бориладиган эълонларнинг аксарияти хусусий АЁҚШларнинг сотилиши ҳақидаги эълонлардан иборатдир. Суҳбатдошимиз буни ёқилғи қуйиш шаҳобчаларини бензин билан таъминлашдаги мунтазам узилишлар, баъзан эса ойлаб бензин келмаслиги туфайли шаҳобча эгаларининг бекорга солиқ тўлаб зарарига ишлаётгани билан изоҳлайди.

ЎХҲ ахборот бўлими