Ўзбекистон банк секторидаги хатарлар юқорилигича қолмоқда – S&P

Ўзбекистон банк секторидаги хатарлар юқорилигича қолмоқда – S&P
58 views
06 December 2014 - 21:32

2Ўзбекистондаги иқтисодий аҳволнинг ночорлиги ҳамда тўлов маданиятининг заифлиги ва ҳуқуқий тизимнинг беқарорлиги туфайли банк секторидаги хатарлар юқорилигича қолмоқда. Бу ҳақда Standard & Poor’s кредит рейтинглари хизматининг жума куни эълон қилинган ҳисоботида сўз боради.

“Банк секторидаги соҳалар ва мамлакатлар бўйича баҳолаш методологияси (Banking industry country risk assessment — BICRA) асосида биз Ўзбекистон Республикаси банк секторини 8-гуруҳга (S&P да рейтинг тизими йўқ) кирита оламиз. Бу ҳолатда Ўзбекистон банк сектори иқтисодий хатарлар бўйича “7”, соҳавий хатарлар баҳоси бўйича “9”-гуруҳга мансуб. S&P баҳолаш услубига кўра, мамлакатлар ўзларининг банк секторидаги хатарларнинг даражасига қараб 1 (хатарлар даражаси энг паст бўлган) гуруҳдан 10 (хатарлар даражаси энг юқори бўлган) гуруҳларга ажратилади.

S&P экспертлари Ўзбекистон банк секторига салбий таъсир кўрсатаётган омиллар сифатида “ички молиявий бозордаги нақд пул билан боғлиқ муаммо ва узоқ муддатли ресурслар ёки халқаро капитал бозорларидан жалб қилинадиган ресурслардан фойдаланишнинг чекланганлиги” кабиларни санаб ўтишади”.

Ўзбекистон банк сектори рейтингини аниқлашдаги ижобий омиллар сифатида эса S&P экспертларининг фикрича, бюджетдаги сезиларли профицит ва иқтисодий мувозанатнинг тутиб турилиши, ёпиқ иқтисодиёт шароитида давлат томонидан кучли назоратнинг амалга ошириши кабиларни тилга олишади.

“Ўзбекистон банкларидаги жамғарма ҳолати давлат томонидан молиялаштириш ва корпоратив депозитлар ҳажмининг кенгайтирилиши эвазига нисбатан барқарор деб баҳоланади. Шунингдек, биз чакана депозитлар улушининг пасайиб бориши ва активларнинг тезлик билан ўсиб бориши оқибатида капиталлаштириш кўрсаткичларининг ёмонлашишини кузатдик”, – дейилади ҳисоботда.

Ҳозирги вақтда Ўзбекистон банк тизимида 27 та тижорат банклари, шу жумладан учта давлат банклари, тўртта ҳорижий капитал иштирокидаги банклар, 11 та акциядолик банклари ва тўққизта хусусий банклар фаолият кўрсатмоқда.

ЎХҲ ахборот бўлими