Йиқилганнинг кўкси ердан қалқмасми?

Йиқилганнинг кўкси ердан қалқмасми?
149 views
20 May 2016 - 5:00

khiva3МАХДУМҚУЛИ

Биринчи китоб

Отамнинг 

Олтмиш ёшда, наврўз куни, лув йили,
Келиб ажал йўлин тўсди отамнинг.
Бу дунё азалдан шодликдан холи,
Умрининг танобин тортди отамнинг.

Оғир давлатларга кўнгил қўймади,
Бу жаҳоннинг ишратини суймади,
Эски шолдан ортиқ кийим киймади,
Охират уйи бўлди қасди отамнинг.

Дерди: Дунё турмас, боъқий умр йўқ,
Кундуз рўза, кеча бўлса уйқу йўқ.
Мункир бўлмас, муҳлисларнинг шаки йўқ,
Пайғамбар йўлидир йўли отамнинг.

Билмасам, айтмасман, кўрганим чандон,
Мақсадига етар интилган чиндан,
Ярими малакдан, ярими жиндан,
Мижозларсиз бўлмас усти отамнинг.

Орқасидан уч юз мардон эргашди,
Унга чилтонларнинг назари тушди,
Орифлар-ла етти пирга улашди,
Абдулладир чин пайвасти отамнинг.

Олам ичра одам қолмас, от кезар,
Бу сирлардан жаҳон халқи ёт кезар,
Жони  жаннат ичра, кўкда шод кезар,
Ерда жўшқин ётар пўсти отамнинг.

Махдумқули, яшир сирингни ичда,
Комил топсанг, қил қуллуғин саришта,
Маҳшар куни ғамсиз кирар беҳиштга,
Ҳар ким чиндан бўлса дўсти отамнинг.

*****

Улар келмади

Кўч-кўрони билан кетди Абдулла,
Ҳамма кетган келди, улар келмади,
Маматсафо кетди кўмак бермакка,
Кузатганлар келди, улар келмади.

Онасидан айри ётмас ўғлонлар,
Ё, Раб, кўрмадими, уларни эллар,
Адашган карвондек айланар йиллар,
Ойлар, йиллар келди, улар келмади.

Ҳатто, сиҳат топди, заҳар тотганлар,
Инжу олиб келди, қўйин сотганлар,
Олти ойлик йўлга Ҳажга кетганлар,
Ҳожи бўлиб келди, улар келмади.

Йироқдан, яқиндан бориб келганлар,
Бормидир уларни кўрган-билганлар,
Ҳиндистонда савдогарлик қилганлар,
Молин сотиб келди, улар келмади.

Тўсатдан йўлиқди дўл билан бўрон,
Бирини юрт билан айлади вайрон,
Қай бирининг ёри изида ҳайрон,
Кўзлари йўлдадир, улар келмади.

Йиқилганнинг кўкси ердан қалқмасми?
Кетганлар келмасми, ғамнок кулмасми?
Ўтгандан, қайтгандан сўрсанг, билмасми?
Кутмаганлар келди, улар келмади.

Махдумқули, дарди қўймас ётмоққа,
Уғрини билмасман, сўраб кезмоққа,
Ердан овоз чиқмас қулоқ тутмоққа,
Кўрган-билган борми, улар келмади.

*****

(давоми бор)

Туркманчадан Мақсуд Қурбон ўзбекчалаштирди