Қора кийган осмон…

Қора кийган осмон…
59 views
24 May 2016 - 5:00

Nochnoe-zvezdnoe-neboБек Мурод 

Йиллар азоби

Тўқсонинчи йиллар шеърияти

АРАФА

 Чинорлар бошидан қарға галаси
Булутдек қўзғолди, кузак шомида.
Тошкент кўчалари, бу маҳал ғамнок,
Хазонлар ўйнайди, уйлар томида.

Қора кийган осмон кўринса-да, тинч,
Бағрида қишлайди, кўринмас тўфон.
Юз йиллар бўлгандир, тош қотганига,
Мазлумлар, қон йиғлар, уйғонмас ҳамон.

Кўз тиккан футувват, кутиб чарчаган,
Кўплар учун Ҳурлик – ўтмиш, хотира.
Шайтондек аврайди, баъзилар ўзин,
Гоҳ бирлар, ўзини эслайди, хира.

Аммо, уйғониши элнинг ҳақиқат,
Ғафлатга ботмоққа ҳеч ҳам ҳаққи йўқ.
Ҳақсизлар бағридан бир кун шижоат,
Ёнмоқ бўлиб, узар, кутмаганда, ўқ.

Шоқоллар ҳукумрон ўлкада, бугун,
Қузғунлар сасига кўмилади, тонг.
Шундай давом этар асрлар бўйи,
Бу маконда, йиллар, ёришмайди онг…

Яллиғланган шуур – оқади, яра,
Ҳақсизликдан заққум қусади, жонлар.
Милтиллаган умид, олса, аланга,
Сўкилар, йиринглар, у ҳаром қонлар…

Шижоат – ўқ бўлиб отилмиш кунлар,
Яқиндир, Озодлик ҳайқириғи, бас!
Ер тишлар у куни олчоқ, золимлар,
Кўз очмасдан яшаш – тириклик абас!

Кўзингни оч, халқим, ҳақсизлик нечун?
Етар, қурбонликлар берганинг қадар.
Етди, сен унмоғинг учун ёруғ кун,
Кўз тикар, йўлингга кутганинг – Зафар!

* * *

Тириклик

Кўзга сиғар, тўгарак жаҳон –
Юракка жой бўлар, дарёлар суви.
Қобиққа сиғмайди оқил ҳеч қачон,
Тор жойда юришмас, шерларнинг ови.

Адолат бор жойда, ҳамиша офтоб,
Баҳорлар уйғонар, ҳар йили қишлаб.
Тириклик тин билмас, бағрида – шитоб,
Барокат чекинмас, ҳаддини, ташлаб.

Мунофиқлар юртнинг ичидаги дард,
Бироқ, барин Ўзи этар сарҳисоб.
Шу янглиғ айланар, эски чархфалак,
Бир куни Мезонда берилар, ҳисоб.

Ҳақсизлик ҳақиқат истаса, агар –
Кўзгуга айланар, миллат ҳам бегард.
Денгизлик даъвосин этса, кўр ва кар,
Соқовнинг кемалик этмоқлиги шарт.

Чўғи йўқ юлдузлар, бўлсалар мезон,
Ҳеч замон у юртдан чиқмайди, дарға.
Масаллиқсиз, ёнар, осилган қозон,
Лочинсиз осмонни тутади қарға.

Кўзга сиғсин, майли, тўгарак жаҳон,
Юракка жой бўлсин, дарёлар суви.
Қарғаларга макон бўлмасин, осмон,
Миллатга етмасин, ёмоннинг дови.

* * *

(давоми бор)