Энди бироз ёмон бўлайлик

Энди бироз ёмон бўлайлик
80 views
06 November 2016 - 9:31
ЭНДИ БИРОЗ ЁМОН БЎЛАЙЛИК
 
Ўзбекистонда Каримов ўлди, аммо Каримовнинг ўлкамизда иншо этган сиёсий режими тирик қоляпти.
 
Унинг тириклигини биздан кўпроқ, Каримовнинг меросхўрлари ҳар қулай фурсатда қайд этишдан чарчамаяптилар.
Бунинг исботи сифатида, Каримов конституцияни бузиб, 27 йил иқтидорда қандай қолган бўлса, бугунги муваққат ҳукумат ҳам айнан Каримов каби Контитуцияни бузиб, Президентлик лавозимини ишғол этди…
 
Бу янги ҳукмдор самимият билан Каримов йўлидан кетишини эълон қилди.
 
Аммо биз шундай бир очиқ баёнотдан сўнгра ҳам режимдан ўзгаришлар кутиб, кир босган дўппиларини кўкка отаётган шоввозларга ҳайратланаяпмиз.
 
Ажабо, бу ўзгаришларни фақат улар кўраяптию, биз кўрмаяпмизми?
 
Бу дупписини осмонга отаётган зиёсиз зиёлиларнинг ёки кўзлари кўр ёки ҳақиқатан ҳам ўз манфаатлари учун ватанини сотишга ҳам тайёр шахслар.
 
Эй, жаноблар, Русия раҳбари Путин Самарқандга Каримов қабрига гулдаста қўйиш учун келмади, у Мирзиёевдан Москвага садоқатда ваъда олиш учун келди ва ўз истагига тўла эришди.
    
Аслида, Мирзиёев бу тайёргарликларни Каримов ўлим тўшагига ётган ондаёқ бошлаган эди. Ўзбекистон халқини кутаётган бу муҳтамал фожианинг қисқача ҳикояси шундай:
 
Владимир Путин 30 август ва 1 сентябр кунлари орасида Шавкат Мирзиёевнинг назоратли сайловлар орқали Президентлик курсисига муаммосиз ўтиришини таъминлаш мақсадида Россия Федерал хавфсизлик хизмати (ФСБ) ходимларидан иборат 300 кишилик гуруҳ юборди Ўзбекистонга.
Бу гуруҳга қуролли амалиётлар устаси булган ҳарбий гуруҳ илова қилинди ва улар Тошкент ва бошқа катта шаҳарларга жойлаштирилди.
 
Бу ишлар Бош Вазир Мирзиёевнинг талаби ва розилиги билан амалга оширилди.
 
Каримов қабрининг фонида олинган суратга қарасангиз, Путин ва Мирзиёевнинг юзларидаги севинчни кўзойнаксиз ҳам кўришингиз мумкин. Шу қадар аниқ севинч!
 
Путиннинг 2016 йил 6 сентябр куни Самарқандда узбек диктаторининг мозорига қўйган гулчамбари, аслида, бир ўлка Мустақиллиги мозорига қўйилган гулчамбардир.
 
  Бу муболаға эмас, бунинг муболаға эмаслигини  куни кеча “Царьград ТВ” дан чиққан рус шовинисти “авроосиёчи” Дугин тасдиқ этди. У “Узбекистон Каримовдан кейин Москвасиз ўз мустақиллигини сақлай олмайди” дея баралла баёнот берди. (https://www.youtube.com/watch?v=cMq9tfB2k3E)
 
Узбек халки Рус халки билан дустлик ичида яшашни истайди, узбек давлати Россия давлати билан якин хамкорлик килишни истайди, Аммо Русиянинг бугунги хукмати Марказий Осиё давлатларига нисбатан экспансив муносабатини давом эттирмокда ва бу бизнинг халкларимизни жиддий равишда андишалантирмокда.
 
Мирзиёевнинг муваккат хукумати Путин Россияси билан тахликали бир уйин олиб бормокда. Мирзиёвнинг маддохлари эса, узбек ватанпарварларини Мирзияевнинг килаётган ижобий ишларини курмаётганликда айблаяпти. Киргизистон ва Тожикистон билан чегараларини очгани ва халк билан контакт ўрнатганини кўрмаяпти,деб айблайди.
 
Холбуки, муваққат ҳукуматнинг Қиргизистон чегарасини очиши бизни севинтирди.
 
Аммо асрлар давомида айни жўғрофия, айни маданият ва айни тарихни биз билан баҳам кўрган Қозоғистон, Туркманистон, Тожикистон чегаралари ҳам ҳудди шундай очилиши керак. Тиканли симлар олиб ташланиб, халқларимиз бир-бирлари билан ўтмишда қандай қардошча яшaган бўлишса, бугун ҳам шундай яшашлари учун имкон яратилиш керак.
 
Энг муҳими, янги ҳукумат бу ҳуррият эшикларни юрт ичкарисида ҳам, ўзбек халқига очиши керак, қуллик рамзи бўлган ОВИР каби муасасаларни дарҳол бекор қилиши лозим. Бу бир рижо ва бир ёлвориш эмас, бу бир талабдир, ҳақларимизнинг конституцивий талабидир.
 
Айтиш мумкинки, бу дунёга сочилиб кетган 8 миллионлик муҳожир нуфузининг энг долзарб талабидир.
 
Камина тоталитар тузумнинг шуурли бир душманиман, аммо бу системада бир яхши нарса кўрса, бир чатнаш пайдо бўлса, уни дарҳол кўриш басирати – алҳамдулиллоҳ – бизда ҳам бор.
Фақат бу чатнашни шу онда мен кўролмаяпман.
 
Майли, ўша “чиқиш визаси” деб аталган разолат тимсоли (ОВИР) бекор қилинсин, биз буни тоталитар системанинг илк чатнаши улароқ қабул этишга тайёрмиз!
 
Аммо ҳукумат тарафдори булган сайтлар 2015 йил Каримов имзолаган юрт ташқарисига чиқиш шартларини “такомиллаштириш” ҳақдаги қарорни такрор эълон қилишди холос. Яъни ОВИР бўйинтуруғи миллат бўйнидан олиб ташланмайди, аксинча такомиллашади бундан буёғига.
 
       Зулм такомиллашади.
       Зулм такомиллашмоқда. Ха, жазо машинаси такомиллашади, қабоҳатнинг мускуллари қувватлантирилади.
Бунинг энг сўнгги исботи, Каримов даврида 23 йил зиндонда ўтирган ЭРК партияси аъзоси, собиқ миллатвакили Самандар Куқоннинг жазо муддатини Мирзиёев ҳукумати яна 3 йилга узатди.
 
Мирзиёев келди, дея oсмонга отилган дўппилар ерга тушиб улгурмасдан, давлат террори янгидан шохланди. Диндорларга бўлган репрессия ҳам Каримов давридагидан баттарроқ бир шаклда давом этмоқда: шу сўнгги ой ичида Ўзбекистонда, хусусан Фарғона водийсида, Андижон, Наманган, Қўкон шаҳарларида юзига маска таққан жаллодлар диндор оилаларнинг уйига бостириб кириб, тинтув ўтказиб, уриб-синдириб, бегуноҳ мусулмонларга зулм ўтказмоқда.
 
Xудди 27 йил аввал Мирзиёевнинг отаси Каримов фаолиятини қандай бошлаган бўлса, бугун унинг меросхўри Мирзиёев ҳам илк одимини диндор ва сиёсий мухолифлар устига отди.
Шунинг учун ҳам муваққат ҳукумат келганига қарамай, Ўзбекистондан қочаётган инсонлар сонида озайиш эмас, кўпайиш кузатилмоқда. Муxожир оқими тўхтагани йўқ.
 
Ўзбек муxожирлари сони бугун нақ САККИЗ МИЛЛИОН га етди!
Бу бир Оврупа ўлкаси Норвегия нуфузининг деярли икки мисли!
Бу бизнинг ён қўшнимиз қардош Тожикистон нуфузига тенг бир нуфуз!
 
Нима бўлди бизнинг ўлкамизга?
 
Йилларча фуқаролар урушини бошдан кечириб, хонавайрон бўлган ўлкаларда ҳам бу қадар инсон ресурси бу қадар қисқа бир муддатда юртини тарк этмаган.
СИЁСИЙЛАШУВ
 
Биз яна бир 25 йиллик зулм даврига тайёр эмасмиз, бунга таҳаммулимиз йўқ. Энди ўз хақларимизни ҳимоя қилмасак бўлмайди. Бу ишни Ғарблик инсонсеварларга топшириб, улардан мадад кутиб ўтиришни бас қилишимиз керак.
 
Хақларимиз учун ўзимиз жангга кирмасак, биз бу ботқоқдан асло қутула олмаймиз. Жамиятимиз сиёсийлашуви лозим. Мусулмонлар сиёсийлашувлари керак.
 
Маълумки, аввал Советлар, кейин Каримов режими халқимизни сиёсатдан узоқ тутиб келди.
 
Номи республика, амалда эса Москванинг бир вилояти қўнимида бўлган ўлкаларимизда фақат Москвадан юборилган кишиларгина сиёсат билан шуғулланиши мумкин эди.
Ерли раҳбарлар юқоридан келган амрларни бажарадиган бир ижрочи маъмурлар эди холос. Кенг халқ оммаси учун эса сиёсат билан шуғулланиш у ёкда турсин, бу ҳақда орзу қилиш ҳам таҳликали эди.
 
Бу ҳолат биз мустақиллик эълон қилингандан кейин ҳам ўзгаргани йўқ. Халқ сиёсатдан бугун ҳам узоқ ва тоталитар режим бу ҳолатни нормал ва ҳатто жоиз деб кўрсатаяпти.
Режим дин ва сиёсат айрилиғи принципини, лаицизимни рўкач қилиб, мусулмон халқни сиёсатга аралаштирмаслик учун курашяпти ва бу йўлда дин арбобларидан унумли фойдаланяпти.
 
Диндорларга ва сиёсий мухолифатга қарши юритилаётган давлат террорига қарши халқдан бир сас чиқмаётган бўлса, бунда давлат тарафини олаётган дин пешволарининг роли катта. Улар дин бошқа сиёсат бошқа деган сафсата билан мусулмонларга янглиш йўл кўрсатмоқда ва катта гуноҳ ишламоқда. Чунки дин биз учун ҳаётимизнинг бутун жабҳаларига низом берган глобал мафкурадир, сиёсат ҳам унинг ташқарисида бўла олмайди.
 
Пайғамбаримиз саллоллоҳу алайҳи вассаллам айни пайтда буюк сиёсатчи ҳам эди.
 
Туркистон мусулмонлари буни унутмаслиги керак.
Биз сиёсий ҳаётга доxил бўлганимизда эди, ислом дунёси устида ўйналаётган ўйинларни тезроқ англаб, уларга қарши вақтида тадбир олишимиз мумкин эди. Бизнинг маҳаллий тоғутларнинг ҳомийлари фақат Шарқда эмас, балки бизга ҳуррият ва демократия маркази деб айтилган Мағрибда ҳам етарли эканлигини аллақачон кўрган бўлардик.
 
Бошка тарафдан,бутун балолар манбаини бегона ўлка ва мафкураларни кўрсатaверишдан  ҳам тийилишимиз керак.
Биз ўзимизга ҳам танқидий қарашга ўрганишимиз керак.Балки ҳатто ҳаммасидан аввал ўзимизга, ўз нафсимизга назар солишимиз, уни ислоҳ қилишга ҳаракат қилишимиз керак.
МУСУЛМОН ЖАМОАСИ
Ислом давлатларининг дунёвий ҳаётнинг бутун жабҳаларида энг қолоқ давлатлар эканини ёзаётган мухолиф мафкуралар ўз иддаоларини биз эътироз эта олмайдиган далиллар билан исботлашмоқда.
 
Фақат улар бу қолоқлик сабабини янглиш йўрумламоқдалар. Улар ислом дунёсининг қолоқлигини ислом динидаги консерватизм билан изоҳлайдилар. Қўпол айтганда, бу қолоқликка ислом дини сабаб дейишади.
 
Биз қолоқлигимизни тан олaмиз, аммо унинг сабаблари хусусида ислом мухолифларига зид тарафдамиз.
 
Бизнингча, мусулмонларнинг қолоқлик сабаби мусулмон бўлганликда эмас, аксинча, мусулмон бўлмаганликдадир.
Ёки том мусулмон бўлмаганлигидадир.
 
Яъни қолоқлик тамалида иқтисодий, ижтимой ва сиёсий сабабларидан ҳам кўпроқ маънавий сабаб ётибди.
 
Бир ҳалол ва тақводор мусулмон иш одамини танийман. У ўз диндош биродарларидан кўпроқ Оврўполик ёки Яҳудийлар билан ҳамкорлик қилади. Бунинг сабабини сўраганимда, у “оврўполик ва ёки яҳудий иш одамлари билан иш қилиш қулай, осон ва амниятли”, деб жавоб берди укамиз.
 
“Нега?” деб сўрасам, у сўзма-сўз шундай деди: “Чунки мусулмонлардан фарқли ўлароқ, Оврўполиклар ваъдасига вафо қиладилар, омонатга ҳиёнат қилишмайди, гапирса ёлғон гапирмайдилар”, деди укамиз.
 
Мен жуда ноқулай аҳволда қолдим. Чунки Пайғамбаримиз саллаллоҳу алайҳи васаллам юқорида саналган бу фазилатларнинг айнан мусулмонда бўлиши кераклигини таъкидлаган эди.
 
Демак, қолоқлигимиз сабаби ҳали ҳам том мусулмон бўлмаганимиздадир.
 
Қолоқликка яна бир катта сабаб бу мусулмонлардаги Кибрдир.
Биз аввал мусулмонлигимизни, кейин мазҳабимизни, кейин жамоатимизни ягона қутқарилганлар синфи деб биламиз.
Яқинда бир шайx ТВ да чиқиб, ўз муридларига қабрда сўроққа тутилганингда “мен нақшбандий тариқатининг фалон гуруҳиданман” десанг, ҳеч сўроқ қилинмасдан тўғри Ризвоний аълога бориб тушасан”, деб фатво берди.
 
Кейин эснаб ўтириб, «ақл бу куфрга олиб борувчи йўл», деди. Кейин Ибни Сино ва Форобийни ақлли бўлганлари учун “кофир” деб эълон қилди.
 
Бу мусулмон шу қадар ўзидан амин, шу қадар кибрли!
 
Пағамбаримиз саллаллоҳу алайҳи васалламнинг саҳобаларидан Масуқ розияллоҳу анҳу шундай деган эди:
 
“Инсон учун илм ўлароқ Аллоҳ қўрқуси, жоҳиллик ўлароқ манманлик етар”.
 
Юқорида зикр этганимиз шайхда Аллоҳ қўрқуси бўлганида эди, бу қадар жоҳил бўлмас эди.
 
Бошқача айтганда, унда илм бўлганда эди, бу қадар манман бўлмас эди.
 
Аллоҳ мусулмонларни кибрдан қўрисин.
 
Мусулмонларнинг катта бир қисми яна бир балога гирифтор бўляпти. Бу такфирчилик балосидир.
 
Шундай мусулмонлар пайдо бўлаяптики, иштон болоғини унингдек шимариб юрмасангиз сизни кофирга чиқариши ҳеч гап эмас. Соқолингиз унинг соқолидан икки миллиметр қисқароқ бўлса, бу ҳам такфир учун бемалол асос бўла олади. Унга башарангиз ёқмаса, бу ҳам такфир учун етарлидир.
 
Жамоатларнинг кўпчилигида такфир террори ҳукм сурмоқда. Худди коммунист диктаторлар ўрнатган тоталитар режимларда ҳукм сурган террорга ўхшайди бу ҳам:бирор кимса ўз фикрини эркин айтиш жасоратини кўрсатса, зудлик билан такфир террорига учрайди. Бу бир даҳшатдир!
 
Аллоҳим, биз мусулмонларга ҳар нарсадан аввал ақл бергин!
 
Акс ҳолда, биз ҳалок бўламиз.
 
Аллоҳнинг инсон зотига берадиган энг улкан неъмати ҳақиқатан ҳам ақл эканига яна бир марта шоҳид бўлаяпмиз.
 
Ибн Қутайба ўзининг “Уюн-ал-ахбор” китобида бу хусусда бир гўзал ривоят келтириб, шундай дейди: “Жаброил алайҳиссалом Одам алайҳиссаломнинг ёнига келиб:
 
– Сенга уч нарса келтирдим, биттасини танла. – дейди.
– Недир булар? – деб сурайди Одам алайҳиссалом.
– Ақл, ҳаё ва дин, – дейди Жаброил.
– Ақлни танладим, – деб жавоб беради Одам алайҳиссалом.
Шунда Жаброил алайҳиссалом Ҳаё ва Динга:
– Одам ақлни танлади, сизлар кетаверинглар, – деди.
Улар:
– Биз Ақл қаерда бўлса, ўша ерда бўлишга амр олдик, – дейишди ва Ақлдан айрилмадилар”.
 
Қиссадан ҳисса шу-ки, агар Ақл бўлмаса, ҳаё ва ҳатто дин ҳам инсонда узоқ қололмайди.
 
Ақл шу қадар буюк неъмат. Токи Ақлни инкор этар экан, мусулмонларнинг бирор бир тараққиётга эришмоғи мушкулдир.
КУРАШ УСЛУБИ

Сўзимнинг охирида ўзбеклар севган тинчлик ҳақида бир икки сўз сўйламак истайман.

Биз ўзбеклар мусулмон дунёсининг энг тинчликсевар парчасимиз. Биз тинчликни ҳар нарсадан устун қўямиз. Ҳатто ўз оиламиздан, фарзандларимиздан, ҳатто баъзан номусимиздан ҳам устун қўямиз. Бир тинчликсевар миллат ўларок, золимга “тўхта” демаймиз, ўз хақларимиз учун курашмаймиз, яъни жиҳод қилмаймиз, чунки золимдан келадиган балодан қўрқамиз.

Ҳолбуки, буюк фоқиҳ Тобароний бизни зид тарафдан огоҳлантиради:”Жиҳодни тарк этган жамият умумий бир балога дучор бўлади”, дейди у.

Ҳа, агар биз ўз ҳакларимизни тарк этмаганда эди, жиҳодни тарк этмаганда эди, Каримов бу тинчлик тўла мамлакатни 27 йил давомида уруш ҳолатида тута олмасди.

Ҳа, бу мақталган тинчликдан роппа роса 8 миллион киши ташқарига қочди, мингларча инсон ўз эътиқоди ва сиёсий қарашлари учун майдонларда, зиндонларда ўлдирилди. Андижонда бир соат ичида 2 мингдан ошиқ намойишчи отиб ташланди. Аммо биз, бу халқ учун курашга бел боғлаган сиёсий мухолифат, ҳеч қачон қўлимизга қурол олмадик.

Биз тинчлик фетишизми қурбонлари,ўзимизни химоя қилиш ҳаққини қўлланмадик.

Биз дунё жамоатчилигининг ва Ғарб давлатларининг Ўзбекистонда ҳукм сураётган қақшатгич зулмига “тўхта” дейишини кутдик. Биз жуда узоқ йиллар демократиянинг бир сафсата эканлигига ишона олмадик. Ишонгимиз келмади.

Аммо ҳақиқат ниҳоят ўртага чиқди. Биз секин-аста Ғарбнинг ҳам, БМТнинг ҳам айни Каримов каби демократия эмас, қўпол кучни ҳурмат қилишини кўра бошладик. Афғонистонга қочган ўзбеклардан ташкил топган бир маригинал гуруҳ сайловларда миллионларнинг овозини олган бир мухолиф партиядан устун позицияга келганини ҳайрат ичида томоша қилдик.

Бу гуруҳнинг фарқи – у қуролли эди.

Ўзбекистоннинг бутун қўшни давлатлари, Русия ва ҳатто Ғарб ҳам бу кичик, аммо қуролли гуруҳ билан музокарага тайёрлигини, аммо халқ ичида миллионларча тарафдори бўлган бир мухолиф ҳаракатни бир чақага олмаганини кўрдик.

Бу иккиюзлилик француз шоири Андре Френонинг “Чумоли” номли шеъридаги бир кинояни ҳотирлатади:

“Майсазордаги чумолининг ўлиги Нигоҳга ҳам арзимас бир нуқта!..

Ҳа, сен жирканч махлуқ, сени қайноқ сув билан куйдириб юборсайдим!

Аммо сен йирикроқ бўлганингда эди, масалан, минг марта йирикроқ бўлсайдинг агар.

Ва яна бир милтиқ бўлса эди қўлингда,

Сени одамлар мутлоқо ҳурмат қилган бўлишарди”

Ҳа, бизнинг дунёмиз қўлида милтиғи бўлса, чумолига ҳам таъзим қилишга тайёр.

Шундай экан,Мирзиёев режими томонида ташкил қилиниб, халқаро институтлар кузатувида ўтса хам, ҳар қандай мухолифатсиз сайлов бир масхарабозликдан иборат бўлажакдир.

Бу масхарабозликда қатнашмокчи бўлаётган турли давлат ва ташкилотларнинг тамсилчилари бу “умумхалқ овоз бериш” сохтакорлигига шерик бўлажаклар.

Бундан ташқари, бугун ўлкада шундай бир аҳвол-ки, овоз бериш ташкил қилинса-да, бизнинг халқимиз сайловга бормайди. Чунки боришдан фойда йўқлигини билишади.Бу ҳукуматга жуда қўл келади. Халкдаги бу сиёсий пассивлик ҳукумат учун бир ҳадядир.

Уинстон Черчилл “Ёмон ҳукумат сайловга бормайдиган яхши одамлар туфайли ҳокимиятга келади” деганди бир пайтлар.

Шу маънода, биз ўзбеклар яхши одамлармиз.Шу қадар яхшимизки, 27 йил бир тоғутни бошимизга тож қилдик, 27 йил давомида у бизни отди, қирди, турмага ташлади, сургун қилди, аммо у ўлганда xудди отамиз ўлгандай юм-юм йиғладик.

Биз шунчалар яхшимизки, энди ўша Тоғутнинг талабаси бошимизга ўтираяпти, унга ҳам хушомадлар ёғдиришга бошладик. Яна бир 27 йиллик босқичга тайёрланиб, 27 йилдан кейин яна бир марта йиғлашга ҳозирланаяпмиз!

Биз ана шунақа яхши халқмиз.

Eтар, бу қадар яхши бўлиш!

Энди бироз ёмон бўлайлик!

Энди бироз ёмон бўл, халқим!

Ўзингни ва фарзандларингни ўйлаш даражасида ёмон! Уларнинг келажаги учун ҳаракат қилиш даражасида ёмон! Золимга “золимсан” деб, ундан ўз ҳуқуқларингни талаб этиш даражасида ёмон!

Ниҳоят, бу ҳаромийлар салтанатини йиқиб, адолатли бир давлат иншо этиш даражасида ёмон бўл!

Муҳаммад Солиҳ
Ўзбекистон Халқ Ҳаракати лидери