Матназар АБДУЛҲАКИМ

ТАНЛАНГАН АСАРЛАР
1 – жилд

“ОЙДИНЛИК” КИТОБИДАН

КЎРПА КАВИЛАЁТГАНДА

Энам кўрпа қавиб ўтирибдилар.
Бу бахтни кузатиб, ақлим лол қолар.
Игна шўнғиб чиқар дам-бадам тинмай,
Ялт-юлт пайдо бўлар, ялт-юлт йўқолар.

Товланади қизғиш атлас жимирлаб,
Қизартирган гўё сув сатҳин шафақ…
Илон қувиб борар думидан тишлаб,
Шўнғиб-сапчиб қочар кумушранг чавоқ…

* * *

Руҳни йўқламайди саноқсиз юлдуз,
Хаёлим ёришмас тонгларга ўхшаб.
Ҳозир барибирдир кечами, кундуз,
Юракда рўз йўқдир, юрақда йўқ шаб.

Чарақлаб-чақнамай офтоб мисоли
Очиқ кўзларимда ухлар қорачиқ…
Унут бир туш каби моҳтоб висоли,
Осмон билан энди гўё ора очиқ…

* * *

КЎЗБОЙЛОҚЧИ 

Қомати келишган, истара иссиқ,
Бекаму кўст, силлиқ сиёғи.
Қулоқлари шалпанг эмас мутлақо,
Кўзга кўринмайди туёғи.

Нақ одам. Думи ҳам кўринмас,
Нигоҳлари тўла гўё меҳрга…
Шундай бир афсунгар — махлуқдан чиққан,
Ҳайвондан тарқаган шундай сеҳргар.

(давоми бор)