Турибман мен ёлғиз. Бош эгиб…

Турибман мен ёлғиз. Бош эгиб…
18 views
02 July 2018 - 6:00

Матназар АБДУЛҲАКИМ

ТАНЛАНГАН АСАРЛАР
1 – жилд

 

«Кўзларимнинг ёшларидасан,
Юлдузларнинг қошларидасан.
Тоғлар сенинг пойингда эмас,
Сен тоғларнинг бошларидасан».

* * *

«Мард йигитнинг бўлгани янглиғ
Жондан севган азиз бекаси,
Ҳар юлдузнинг, шубҳасиз, бўлар
Ушлаб тургувчи ўз эгаси.
Юлдуз сўнди. Тушди-кетди у.
Қолди ғамгин, нурли йўллари.
Фалакдаги қай чароғбоннинг
Чарчаб қолди экан қўллари?..»

* * *

«Сен кўз юмдинг. Тарк этдинг бизни.
Кетдинг-қолдинг сўрамай-нетмай.
Турибман мен ёлғиз. Бош эгиб.
Қутлуғ қабринг қошидан кетмай.
Ёш тўлдирар фотиҳа учун
Очилган азадор қўлимни…
Дийдор учун энди сенимас,
Мен кутмоғим керак ўлимни…»

* * *

«Ўтганларни хотирлайверсанг
Хаёлингга келмайди нелар.
Дунё элак… одамларни у
Бир лаҳза ҳам тинмасдан элар.
У тинимсиз чайқалиб турар,
Чайқалиши азоб-зулмдир.
Бу элакнинг устида ҳаёт,
Бу элакнинг ости — ўлимдир.
Бу элакнинг устини кўринг,
Кўрингизлар сиз тагларини…
Унларни қор каби ёғдирар,
Қолдиради кепакларини…»

(давоми бор)