Хабар бер

Хабар бер
101 views
16 July 2018 - 6:00

МАХДУМҚУЛИ

 

ХАБАР БЕР

Дурди шоир:

У нимадир, яшил-қизил эсади?
У нимадир, оёғи йўқ кезади?
У нимадир, дарёларда сузади?
Шоир бўлсанг, шундан бизга хабар бер!

Махдумқули:

У экиндир, яшил-қизил эсади,
У илондир, оёғи йўқ кезади,
У балиқдир, дарёларда сузади,
Биздан салом бўлсин, жавобимиз, шул.

– У нимадир, ёқаси бор, ёни йўқ?
У нимадир, қаноти бор, қони йўқ?
У нимадир, одам ютар жони йўқ?
Шоир бўлсанг, шундан бизга хабар бер!

– У кафандир, ёқаси бор, ёни йўқ,
Капалакдир, қаноти бор, қони йўқ,
Қора ердир, одам ютар, жони йўқ,
Биздан салом бўлсин, жавобимиз, шул.

– У нимадир, дарвозасиз қалъадир?
У нимадир, деразасиз бинодир?
У нимадир, бир-бирини қувадир?
Шоир бўлсанг, шундан бизга хабар бер!

– У кўнгилдир, дарвозасиз қалъадир,
У қабрдир, деразасиз бинодир,
Ой билан кун бир-бирини қувадир,
Биздан салом бўлсин, жавобимиз, шул.

– У нимадир, емадилар, тўйдилар?
У нимадир, Қиёматга қўйдилар?
У ким эди, товонидан сўйдилар
Шоир бўлсанг, шундан бизга хабар бер!

– У дийдордир, емадилар, тўйдилар,
У намоздир, Қиёматга қўйдилар,
Насимийнинг товонидан сўйдилар,
Биздан салом бўлсин, жавобимиз, шул.

– У ким бўлди, етти ўлка кезади?
У нимадир дарахт белин эзади?
У нимадир, одам каби сезади,
Шоир бўлсанг, шундан бизга хабар бер!

– У чўпондир, етти ўлка кезади,
У қуюндир, дарахт белин эзади,
Бедов отлар одам каби сезади,
Биздан салом бўлсин, жавобимиз, шул.

– Анлар кимлар, хор-зор бўлиб суринмас?
У нимадир, инсонларга кўринмас?
У нимадир, ҳеч бир тўнга бурканмас?
Шоир бўлсанг, шундан бизга хабар бер!

– Эранлардир, хор-зор бўлиб суринмас,
Бало келса, ҳеч бир кўзга кўринмас,
Ёлғон суҳбат ҳеч бир тўнга бурканмас,
Биздан салом бўлсин, жавобимиз, шул.

*****

(давоми бор)

Туркманчадан Ислом Холбой ўзбекчалаштирди