Тил ҳақидаги қонунни қайта кўриб чиқиш керак

Тил ҳақидаги қонунни қайта кўриб чиқиш керак
29 views
06 May 2019 - 16:51

Айрим вазирлар рус тилига расмий мақом берилиши тўғрисидаги ўриспаратлар мурожаати ортида ҳукумат турмаганини айтиб,

ақллилик қилишга қанчалик уринмасин, кейинги йилларда уларнинг “катта оғаси”га (меники эмас, уларники) қуллуқ сифатида қилаётган ишлари (муз саройи қурилгани,

унда россиялик ҳоккейчилар олиб келиб ўйнатилаётгани, ўша спортчиларга квартиралар ҳадя қилингани, девоннинг администрацияга айлантирилиши, томдан тараша тушгандай, ҳали на лойиҳаси, на қурилиш жойи тайинсиз АЭС қурилишига старт берилиши, 100 томли рус адабиёти ўзбекчага таржима қилиниб,

чоп этилиши ҳақидаги ваъда (аслида бунинг ҳеч қандай ёмон жойи йўқ, бироқ нима учун Россия ҳукумати биз берган шунча ваъдага, ҳечқурса, Навоий ҳазратларининг 1-2 томлигини рус тилида чиқаришни айтиш билан жавоб қилишни ҳам ўзига эп кўрмади?

– гап шунда) айрим стратегик объектларнинг ими-жимида ишончли бошқарувга бериб юборилаётгани) бунинг тескарисини кўрсатиб турибди.

Шунинг учун тўғри гапни ёзаётган ёзувчиларга осилиш ўрнига она тилни сақлаб қолиш, яна халқнинг қўл-оёғини ўшаларга боғлаб бермасликка ҳаракат қилишса, яхши бўлар эди.

Тил ҳақидаги қонунни қайта кўриб чиқиш вақти аллақачон етган. Ҳамон юқори идораларда барча ҳужжатлар русча тайёрланаётган, пастдаги идоралардан ҳисоботларни русчада ёзиш талаб қилинаётган экан, у қанақа қонун бўлди? Қонун талаблари бажарилмагандан кейин унинг қонунлиги қоладими?

Тил ҳақидаги қонундан рус тили ҳақидаги гапларни бутунлай чиқариб ташлаш керак. Рус тили бизнинг ҳимматимизга, ҳимоямизга муҳтож эмас. Ана, Россияда қанча ҳимоя қилишса, килаверсин.

Адашмасам, Олий Советнинг лотин алифбосига ўтиш тўғрисидаги қарорида бу муддат 2010 йил қилиб белгиланган эди. 2019 йил яримлаб қоляпти ҳам 2010 йил жонивор келай демайди.

Фахриддин Низомов