ГАПИР, ТУРКИСТОН

Роппа-роса минг йилдан буён
Рўза тутиб, оғиз очмаган ҳамон
Турк саркардаси –
Тиёншон.

Минг йил  давомида у емаган нон,
Унинг  насибаси-минг йиллик  увол –
Тузга тўлиб бораётган туздон –
Орол.

Саркарданинг гўзал қизи ўтлоқда
Оқ илонни  босиб, деганида «Вой!»
Чиққан товуш, кумушранг ҳалқа –
Ой!

Ўтлоққа шитирлаб сингиб бораётган,
Бебахт Осиёдан кочаётган мангу
Бу оқ илон,  муқаддас илон –
Аму…

Яна «Вой!» дема қиз. Етар битта Ой.
Оғзинг очма гўзал, этма овоза.
Фақат отангга айт: оғзини  очсин –
Тугади рўза!

1987

Муҳаммад Солиҳ
“Вал-Фажр” китобидан