Ректорлар олийгоҳларда порахўрликка қарши курашишга ваъда бермоқда

Ректорлар олийгоҳларда порахўрликка қарши курашишга ваъда бермоқда
98 views
18 July 2019 - 11:43

“Озодлик” радиосининг хабар беришича, Ўзбекистон Олий ва ўрта махсус таълим вазири ҳамда олий таълим муассасалари ректорлари профессор-ўқитувчилар ва жамоатчилик вакиллари билан биргаликда коррупцияга қарши курашиб, Ватан тараққиёти йўлида сидқидилдан хизмат қилишга ваъда берганлар.

Бу ваъда Олий ва ўрта махсус таълим вазирлиги сайтида чоп этилмиш “Олий таълим соҳаси вакилларининг Ўзбекистон халқига мурожаати”да акс этган.

Мурожаатномада ректорлар шу кунда Ўзбекистонда соғлом ва ҳар қандай иллатлардан холи бўлган таълим-тарбия муҳитини шакллантириш ҳар бир кишининг муҳим ва устувор вазифаси бўлиши лозимлиги, бу йўлда тўсиқ бўлаётган муаммоларни баратараф этиш, таълим тизими софлиги ва шаффофлигини таъминлаш, айниқса, унинг обрўсига путур етказаётган коррупцияни бартараф этиш кечиктириб бўлмайдиган вазифа бўлиб ҳисобланишини урғулайдилар.

“Шарқда ўқитувчи, устоз ҳамиша донишмандлик, ахлоқий поклик, ҳалоллик рамзи бўлиб келган. Таассуфки, айрим тамагир, таълимга тасодифан кириб қолган, ўз манфаатини халқ манфаатидан устун қўядиган кимсалар туфайли таълим муассасалари халқ назарида маълум даражада обрўсизланди”, дейилган мурожаатномада илм-фан даргоҳларига “коррупциянинг суваракдек ўрмалаб киришига асло йўл қўймаслик” зарурлиги таъкидланади.

Коррупцияни енгиш учун мурожаат эгалари етти қадамдан иборат режа таклиф қиладилар. Мурожаатнома Ўзбекистонда қабул имтиҳонлари бошланиши арафасида пайдо бўлди.

Халқаро ташкилотлар чиқарган ҳисоботларда Ўзбекистон коррупцияга ботган давлатлар рўйхатидан жой олиб келади.

Тошкентдаги “Ижтимоий фикр” жамоатчилик фикрини ўрганиш маркази томонидан яқинда ўтказилган коррупция бўйича сўровда қатнашганларнинг 66,5 фоизи Ўзбекистонда коррупция кенг тарқалганини эътироф этган.

ЎХҲ ахборот бўлими