Бўларсан

Бўларсан
36 views
10 August 2019 - 10:50

 

БЎЛАРСАН

Баланд тоғлар, буюкман деб гердайма,
Хумчада сув бўлган зардек бўларсан!
Заранг дарё, ҳайбатингга қувонма,
Вақти етса, қуриб ердек бўларсан!

Тоғлар арислони, бобир-фаланги,
Бир куни тенг бўлар фил, пашша жангги,
Жайҳун дарёсию, Нилнинг наҳанги,
Бошига урилган хардек бўларсан!

Қиёматдан бир сўз дедим бу ёқда,
Хатар бордир ноҳақ теккан таёқда,
Золимлар хор бўлар, қолар оёқда(н),
Ғариб, сен йиғлама, шердек бўларсан!

Йўрға бедов миниб, гўзал ёр қучган,
Баридан узилар боқийга кўчган,
Ҳақиқий номарддир, имонсиз кечган,
Имон билан борсанг, нардек бўларсан!

Яхшилар ёнинда юргил сен ўзинг,
Дур бўлсин доимо сўзлаган сўзинг,
Олимга эргашсанг, очилар кўзинг,
Жоҳилга эргашсанг, кўрдек бўларсан!

Луқмон каби ҳар иш чорасин билсанг,
Сулаймондек девни фармона солсанг,
Искандардек ернинг юзини олсанг,
Охир яксон бўлиб, ердек бўларсан!

Гарчанд, насиҳатдир эллара сўзинг,
Элга айтмай туриб, аввал тут ўзинг,
Номаҳрамдан фарҳез эттиргил кўзинг,
Ҳалолда хайр бор, кордон бўларсан!

Махдумқули, қараб сўзла дошингни,
Жойин билиб тортгин бўлса ошингни,
Комил топсанг, қўй йўлинда бошингни,
Эр изинда юрсанг, эрдек бўларсан!

МАХДУМҚУЛИ
* * *
Туркманчадан Ислом Холбой ўзбекчалаштирди

facebook.com