Ёпилаётган нашрлар сафи кенгаймоқда

Ёпилаётган нашрлар сафи кенгаймоқда
50 views
16 October 2019 - 22:25

ВВС радиосининг хабарига кўра Ўзбекистон Ахборот ва оммавий коммуникациялар агентлиги Togri.uz интернет нашрининг ёпилиши ортида сиёсий сабаблар турганини рад этиб чиқди.

Агентлик директори Комил Алламжоновга кўра, “бу таъсисчиларнинг ички ва шахсий масаласи”.

Togri.uz ёпилишидан 24 cоат ўтиб берган баёнотида Алламжонов интернет нашри фаолияти узоқ давом этмаганидан афсусда эканини айтган.

“Togri.uz интернет нашрининг фаолияти афсуски узоқ вақт давом этмади.

Шуни алоҳида қайд этиш керакки, «Togri.uz» сайти фаолияти тўхтатилгани бу таъсисчиларнинг ички ва шахсий масаласи бўлиб, сиёсий сабабларга асло боғлиқ эмас.

Шу билан бирга, Агентлигимиз юртимиздаги оммавий ахборот воситаларининг сони янада кўпайиши, уларнинг цензурадан холи, эркин фаолият кўрсатиши тарафдори бўлиб, бунинг учун биз барча имкониятларни яратишга тайёр эканлигимизни таъкидламоқчиман”, деган АОКА раҳбари.

Айни пайтда мустақил иқтисодчи Юлий Юсупов ўзининг Фэйсбук саҳифасида “ҳокимиятга таъсир ўтказиши мумкин бўлган мустақил электрон ОАВлар даври тугади” деб ёзди.

Унинг қайд этишича, “ҳокимият эндиликда нафақат танқидга ижобий муносабат билдирмаяпти, балки унинг учун жазоламоқда ҳам”.

“Охирги бир йилдаги тенденциялар (имтиёзли бизнес лоббистларниинг мутлақ ўзбошимчалиги, хусусий мулкни тортиб олиш ва қайта тақсимлаш тўлқини, протекционизмнинг янги тўлқини, қарор қабул қилишдаги тобора ношаффофлик)ни ҳисобга олган ҳолда қайд этиш жоиз: ЭСКИ ТИЗИМ ҒАЛАБА ҚИЛДИ. У қадам бақадам ўзининг олдинги мавқейини қайтариб олмоқда. Биз аста-секин (охирги пайтда илдамроқ), аммо қатъият билан орқага қайтяпмиз. Бизни олдинда оғир кунлар кутмоқда”, деб ёзди Юлий Юсупов.

Манба: bbc.com/uzbek