Учдим, ёронлар

Учдим, ёронлар
35 views
06 April 2020 - 14:57

 

УЧДИМ, ЁРОНЛАР

Бир жума кечаси, кўрдим, тушимда,
Бол уриб, кўкларга учдим, ёронлар.
Парвоз айлаб, сайрон этдим, дунёни,
Бир ободон жойга кўчдим, ёронлар.

Каҳкашонга чиқиб, турли самарлар,
Минг турли мевалар, хуррам шажарлар,
Нордон, ширин, турли-туман олмалар,
Бир ҳаволи боққа тушдим, ёронлар.

Очилмишдир, анда ранг-баранг гуллар,
Шўришу афғонда шайдо булбуллар,
Мармардан ҳовузли, кавсардек сувлар,
Ҳайратларга тушиб шошдим, ёронлар.

Ул қора боғларда, кўркам бир чаман,
Ажойиб, мажлислар, кўрдим анжуман,
Давра олиб турар эди қирқ чилтон,
Салом бериб, қўлин қучдим, ёронлар.

Саломимга алар, “Алайк!” айтдилар,
Ишорат айлабон: “Ўтгил” дедилар,
Давра қуриб, жомга шароб қуйдилар,
Менга етгач, қўлим очдим, ёронлар.

Билмадим, кўпми ё менга оз берди,
Ўзга олам, бошга бир овоз берди,
Ишқ олди, кўнглимни, тилга сўз берди,
Оёқдан-оёққа тушдим, ёронлар.

Махдумқули, ҳушёр ўлдим, уйғондим,
Уйғондим, ўртандим, туташдим, ёндим,
Маъно бозорида ҳайҳотга дўндим,
Ширин ғазал тўнин бичдим, ёронлар.

МАХДУМҚУЛИ
* * *
Туркманчадан Ислом Холбой ўзбекчалаштирди

facebook.com