АҚШнинг Ўзбекистондаги элчиси журналист Бобомурод Абдуллаев тақдиридан хавотир изҳор қилди

“Озодлик” радиосининг хабар беришича, АҚШнинг Ўзбекистондаги элчиси Даниэль Розенблюм ўзбекистонлик журналист Бобомурод Абдуллаевнинг қирғиз расмийлари томонидан Тошкент сўрови асосида қўлга олинганига оид хабарлардан чуқур хавотирда эканини билдирган.

“Биз унинг ишини диққат билан кузатиб турибмиз”, деб ёзди АҚШ элчиси Твиттердаги ўз саҳифасида 13 август куни.

1/3 I am deeply concerned by reports that Kyrgyz authorities have detained Bobomurod Abdullayev, an Uzbekistani journalist, at the request of the Government of Uzbekistan. We are closely following his case. https://t.co/UZ5yDmChHn

— U.S. Ambassador to Uzbekistan (@UsAmbUzbekistan) August 13, 2020

Жаноб Розенблюмга кўра, Қирғизистон ҳукумати ҳам, Ўзбекистон ҳукумати ҳам Б. Абдуллаевнинг ҳаракатланиш эркинлигини ҳурмат қилиши ҳамда унинг Қирғизистон Республикасидан кўзлаган манзили томон чиқиб кетишига имкон яратиши лозим.

2/3 The Governments of both Kyrgyzstan and Uzbekistan should respect Mr. Abdullayev’s freedom of movement and allow him to depart the Kyrgyz Republic to his destination of choice. https://t.co/YbgA9HGoqP

— U.S. Ambassador to Uzbekistan (@UsAmbUzbekistan) August 13, 2020

Бобомурод Абдуллаев мавзусига дахлдор учинчи твитида АҚШнинг Ўзбекистондаги элчиси Д. Розенблюм президент Мирзиёев ўтган йил декабрида Конституция куни муносабати билан ҳамда ундан кейин бир неча бор ирод қилган нутқларида оммавий ахборот воситалари эркинлиги ва журналистларнинг ҳақ-ҳуқуқлари тўғрисида маънодор гапларни айтганини эслатиб, Қўшма Штатлар эркин ва мустақил оммавий ахборот воситалари амалдаги демократия учун зарурий, деган фикрга қўшилишини урғулаган.

3/3 Further regarding Mr. Abdullayev: Pres Mirziyoyev spoke eloquently about media freedom and journalists’ rights in his Constitution Day speech last December, and many times since. The U.S. agrees that a free and independent media is indispensable to a functioning democracy.

— U.S. Ambassador to Uzbekistan (@UsAmbUzbekistan) August 13, 2020

Бобомурод Абдуллаев 9 август оқшомида Бишкекдаги кафелардан бирида Қирғизистон Миллий хавфсизлик давлат қўмитаси ходимлари томонидан қўлга олинганди. МХДҚ журналистнинг Ўзбекистон сўровига кўра ушланганини билдирган.

10 август куни Бишкекнинг Биринчи май суди Б. Абдуллаевни 8 сентябргача ҳибсда сақлаш бўйича қарор чиқарган. Суд қарорига кўра, журналист бу муддат ичида МХДҚнинг тергов ҳибсхонасида ушлаб туриладиган бўлган.

Душанба кунги суд олдидан Бобомурод Абдуллаев қирғизистонлик журналистларга ўзбек расмийлари томонидан “Қора мерган” тахаллуси билан ёзаётган шахс сифатида гумонланаётганини айтган, бироқ ўзининг бу тахаллус билан мақолалар ёзганини қатъиян рад этган. Айни пайтда “Қора мерган”нинг Телеграм тармоғидаги аккаунти Б. Абдуллаев қўлга олинганидан кейин ҳам фаолият кўрсатишда давом этмоқда.

Бобомурод Абдуллаевнинг қўлга олиниши ортидан “Чегарасиз мухбирлар” (RSF), Amnesty International, Association for Human Rights in Central Asia (AHRCA), Civil Rights Defenders, International Partnership for Human Rights (IPHR), Freedom House, Freedom Now, Norwegian Helsinki Committee (NHC) ҳамда Журналистларни ҳимоя қилиш қўмитаси (Committee to Protect Journalists) каби нуфузли ташкилотлар расмий Бишкекни ўзбекистон журналистни зудлик билан озод қилишга чақирганлар.

ЎХҲ ахборот бўлими